“Aumesmu tempu hanesan mós divulga tiha ona iha Parlamentu Nasionál, katak iha Membru Governu balun ne'ebé la'o tun ba ameasa Xefe suku sira, hodi haruka hili kandidatu númeru 2. Nomós aproveita iha tempu kampaña, ba fahe komputadór, ba promete atu hari’i suku, aldeia ho sira-nia mesajen katak, sé la hili kandidatu númeru 2 mak promesa sira ne'e sei dada hotu kedas, ate uma kbi'it la'ek mós sei dada hotu, tanba la vota ba kandidatu númeru 2”, dehan Deonisio Babo liuhusi konferensia imprensa iha Sede Nasionál, Hudi Laran, segunda (04/04).
Tanba ne'e, ekipa susesu hakarak deklara katak sira rejistu ona buat barak ne'ebé durante ne’e mosu iha komisiu husi kandidatu númeru 2 Francisco Guterres ‘Lú Olo’, ne'ebé hato'o direta husi nia apoiante sira sa'e ba palku halo alegasaun kona-ba fraude eleitorál hanesan uza osan mak sosa votu tama sai uma para dehan katak kandidatu númeru 1 José Ramos Horta nia ema halo fraude.
“Ami buka hela atu deskobre, iha ona indisiu katak fraude sira ne'e balun halo iha karaik husi apoiante ita-nia kandidatu númeru 2 nian. Tanba ne'e ami husu polísia, e mós maluk sira husi orgaun kompetente husi seguransa nian para halo investigasaun”, afirma nia.
Ekipa susesu kandidatu Horta, mós idemtifika iha Oekussi, boot balun iha ne'eba halo intervensaun direta ne'ebé fó osan no obriga funsionáriu kontratadu sira, atu vota ba kandidatu númeru 2, bainhira sira la vota mak sei perde sira-nia servisu.
"Indisiu sira ne'e iha ona, mais ami husu ba orgaun konpotente sira, Polísia, ba observasaun internaisonál sira, ba membru komisaun nasionál ba eleitorál sira, para buka hatene saida mak akontese”, hatete nia.
Hatán ba kestaun ne'e, Vise Ministru Administrasaun Estatál (MAE), Lino de Jesus Torrezão hatete, sira-nia parte seidauk halo amaeasa ruma ba xefe suku sira, atu vota ba sé.
Maibé iha semana kotuk ne'e nia rasik mak ba hala'o duni reuniaun ho lideransa komunitáriu sira iha Oeleu ne'e atubee klarifika lialoos ba Xefe Suku sira nu’udar liman ain Governu tenke koopera ho Governu, maibé la'ós sai opozisaun ba Governu.
“Se sai opozisaun ba Governu hatete de'it, tenke ser dada-an sai, fó ema seluk atu servisu hamutuk ho Governu, ida ne'e laiha ida ameasa, liafuan ameasa ne'e oinsá, la ameasa, ameasa ne'e foti kilat tiru mate ema ka. Ami hatete de'it bainhira la koopera ho Governu, Governu sei hola pozisaun, tanba saida, o kontra Governu, no kontra programa Governu nian”, haktuir nia.
Tanba, durante kampaña ba eleisaun Prezidensiál, xefe suku no konsellu suku balun, halo dor to dor, hatete ba eleitór sira katak programa uma kbi'it la'ek ne'e programa CNRT nian no pior liután mak Xefe suku sira fó fali xamada ba populasaun katak bainhira sira la vota kandidatura husi partidu CNRT nian, sira sei halo kada benifisiáriu ne'ebé hetan uma kbi’it la’ek, sei selu filafali impostu fula-fulan.
Ho ida ne'e mak, Ministériu Administrasaun Estatál, tun ba halo reuniaun lideransa komunitáriu, atubele esplika ba líder komunitáriu sira katak informasaun ne'ebé dehan Programa UKL ne'e CNRT nian, ida ne'e laloos tanba programa ne'e maihusi Governu daualu husi partidu plataforma hanesan FRETILIN, PLP no KHUNTO ne’ebé la envolve Partidu CNRT. (*)
