Portavoz CPD-RDTL Setór II, Francisco Loy Sahe, afirma, ativista, veteranu, traballadór no povu maubere ne’ebé hamahan-aan iha Frente Ampla sei fó votus konfiansa ba kandidatu, Francisco Guterres Lú Olo atu asegura povu nia direitu, hametin justisa, kombate korrupsaun no lori progresu real ba povu maubere nia moris.
"Ami ne'ebé uluk vota tiha ona ba irmão Xanana, Ramos Horta, Taur Matan Ruak ba Prezidente Repúblika, agora sei vota tán ba bandeira Fretilin, hodi lori Francisco Guterres Lu-Olo ba segundu mandatu atu kompleta nia misaun hodi konsolida RDTL kore akordu sofa, ne'ebé kesi metin RDTL desde 01 de outumbru 2002 to'o ohin loron, i asegura RDTL nu'udar pais naun aliadu non blok no amante da paz," Nia afirma iha Sede CPD-RDTL Setor II funu nafatin Baukau, segunda (04/04).
CPD-RDTL husu mós ba José Ramos Horta, di’ak liu hola pozisaun ba hela iha rai liur atu asegura situasaun ne’ebé fó risku mai Timor-Leste, tanba iha koiñesimentu no esperensia kle’en ba luta diplomasia.
"Votu ne'ebé fó ba Fretilin ho kamarada Lu-Olo nia fotografia la'os kontra irmão José Ramos Horta, maibé fó liberdade ba irmão Horta rasik, katak irmão José Ramos Horta hela nafatin iha liur no livre hodi la'o sai ba exteriór, tanba ho esperensia diplomátika boot ne'ebé iha, bele konsentra atensaun ba funu iha Europa Leste atu hapara labele habelar sai ba fatin seluk no sai ba funu nuklear," nia argumenta
Nune'e, alerta ba apoiante sira hotu ne’ebé dadaun hakarak dudu ida-idak nia kandidatu ba Prezidente Repúblika, labele haree de’it ba situasaun nasionál, maibé tenke iha konsiensia kona-ba situasaun perigozu sira iha mundu internasionál. (*)