Krítika ne’ebé halo ba Parlamentu Nasionál (PN) ho Governu, tanba durante ne'e halo lei proteje sira-nia an, atu labele hetan kondenasaun bainhira foti osan husi Fundu Minarai.

“Ohin ema balun dehan hanesan ne'e, ouh ida ne'e na'okten, ida ne'ebé na'okten, la'ós o nia responsabilidade atu sura na'okten. Maibé ohin ema balun halo lei para nia halo sasán rungu ranga, nia foti Estadu nia osan nia la sala ida, tanba nia halo tiha ona bareira lei, e depois para labele kondenadu”, esplika nia iha mini kampaña ba segundu volta Kandidatu José Ramos Horta iha Munisípiu Likisá, domingu (03/04).

Tanba realidade ida ne'e hatudu momoos hela, maske durante ne'e iha buat barak mak sala maibé labele hetan kondenadu tanba lei proteje hela sira.

“Tanba ne'e mak ita presiza filafali Prezidente Repúblika ne'ebé loloos, Primeiru Ministru ne'ebé loloos, para konstrui Estadu ida ne'e tuir mehi funu na'in-sira, tuir mehi eroi 300 mil (pesoál) ne'ebé sosa ho sira-nia rán ho ruin mak ohin ita goza ita-nia liberdade, la lakon ita-nia responsabilidade atu fó kontinuasaun katak rai ida ne'e tuir duni sira-nia mehi”, hatete Assnami.

Tanba ne'e, ferik katuas, joven, no ba ema hothotu husi oioin, no partidu oioin, presiza uza konfiansa ida ne'e, atu vota ba kandidatu Prezidente Ramos Horta, no lalika kolen ona atu ko'alia tán mean baku fila ka mutin baku fila.

Iha atividade diálogu ka mini kampaña ne'e, hetan partisipa másimu husi militante Uniaun Demokrátiku (UDT), Partidu Demokrátiku, PST, PDRT, Frente Mudansa, PATIFOR, nomós hetan observasaun direta husi Komisaun Nasionál ba eleisaun sira (CNE), Sosiedade Sivíl sira inklui hetan mós observasaun internasionál sira. (*)