Print this page

FRETILIN-KHUNTO Rejeita GAM Kria Instabilidade, Xanana 'Lori Todan'

Bandeira Fretilin ho KHUNTO. Bandeira Fretilin ho KHUNTO. Foto Espesial

Tempotimor (Dili)-Partidu Frente Revolusionáriu Timor-Leste no Independente (FRETILIN) no Kmanek Haburas Unidade Nasionál Timor Oan (KHUNTO) rejeita ukun na'in sira fó sala ba Grupu Arte Marsiál (GAM) sira kria instabilidade iha rai laran, tanba sala ne'e maihusi governasaun anterior ne’ebé lidera husi Kay Rala Xanana Gusmão.

“Bainhira ha'u tun hanesan Sekretáriu Jerál halo kampaña, ha'u dehan problema ida ho buat hothotu fó kulpa de'it ba Arte Marsiál sira ne'e sala, kulpa mak sira be taka arte marsiál sira”, dehan Sekretáriu Jerál Partidu FRETILIN, Mari Bim Amude Alkatiri, bainhira partisipa kampaña segundu volta kandidatu Francisco Guterres ‘Lú Ol’, ba loron daruak iha Suai-Kovalima, domingu (03/04).

Haree ba instabilidade sira ne'ebé mak mosu, ema baku malu iha Dili-Oekussi no iha fatin hothotu mós arte marisiál sira mak sala, maibé ida ne’e la loss.

Tanba ne'e, iha momentu kampaña FRETILIN hatete kuandu manán sei kumpre ho nia promesa sei loke filafali arte marsiál tanba realidade agora FRETILIN tama iha Governu daualu loke duni ona ne'e.

“Tanba KHUNTO, PLP hamutuk ho FRETILIN, loke filafali arte marsiál, maibé loke fila de'it la to'o, fó liberdade atu organiza-an de'it la to'o, tenke fó kondisaun sira mós”, esplika nia.

Kestaun arte marsiál ne'e, nu’udar koordenadór plataforma Governu daualu nian, sei aprezenta proposta ba Governu atu hari’i sede ba Grupu Arte Marsiál hothotu, tanba públiki tomak haree no hatene katak organizasaun ida ne'ebé de'it pesiza uma (sede) atu hala'o servisu.

“Ha'u hakarak hatete ba Grupu Arte Marsiál hothotu, tinan ida ne'e ho tinan 2023, promesa ne'ebé Governu iha ona ne'e sei kumpre. Governu mak ida ne'e, ho Prezidente mak tur iha ne'ebá ne'e, to'o 2023 sei kumpre mós promesa hari’i kedúng ida atu halo graduasaun (sa'e sintu) ne'e iha Timor-Leste, ne'e mós sei kumpre”, afirma nia.

Konselleru Superiór Partidu KHUNTO, José dos Santos ‘Naimori Bucar’ hatete, kona-ba Grupu Arte Marsiál ne'e, uluk partidu CNRT, KHUNTO, PLP kuandu forma koligasaun Aliansa Mudansa ba Progresu (AMP) ba promete atu reativa organizasaun sira hanesan Persaudaraan Setia Hati Terate (PSHT), Ikatan Kera Sakti (IKS) no Kmanek Oan Rai Klaran (KORK) maibé ikus mai Xanana deside nonok.

“Uluk maun Xanana, ha'u ho maun Taur kampaña AMP dehan katak ita manán reativa organizasaun tolu ne'e, hein to'o tinan ida Maun Xanana nonok hela la loke, ha'u mak ne'e, tanba ha'u mós iha ne'ebá”, dehan nia.

Bainhira Xanana ses-an husi koligasaun AMP, mak FRETILIN ba filafali haforsa Governu daualu hodi kontinua sira-nia mandatu to'o iha tinan lima.

Ho ida ne'e, momentu ne'eba Naimori ba hasoru m Alkatiri ho Taur, atu fó hanoin tenke reativa fali atividade Grupu Arte Marsiál tanba sira inosente.

“Sé ita la loke iha ne'e, sira tenke ba Indonézia dehan mai lori moras, ema seluk mak halo ita dún ba sira, ne'e labele. Entaun ha'u hatete ba maun Taur, telefone ba Sekretáriu Estadu Joventude no Desportu atu ko'alia kona-ba asuntu ida ne'e, entaun sira konsege rezolve problema ida ne'e”, dehan nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items