“Ami tau tiha ona iha ami-nia diskusaun katak, ami la konkorda ho pozisaun ida disolve ne'e, maibé temi liafuan promove diálogu”, deklara Kaloha liuhusi Konferénsia Imprensa iha sede PD, Kolmera, sesta (01/04).
Tanba PD konsidera kandidatu José Ramos Horta iha kapasidade atu promove diálogu ho garantia unidade nasionál, maibé la konkorda atu disolve.
“Konsidera katak kandidatu partidu CNRT, José Ramos Horta iha kapasidade atu promove diálogu, garantia unidade nasionál no vontade atu kumpri order konstituisaun no respeita konstituisaun”, afirma nia.
Prezidente PD, Mariano ‘Asanami’ Sabino hatete, PD hahú fali ho etapa foun ba kandidatu Prezidente Repúblika, José Ramos Horta no Francisco Guterres 'Lú Olo'.
“Parabéns ba kandidatu na'in-2 ne'ebé mak iha númeru boot atu avansa iha segundu ronde, ho esperansa boot katak kandidatu na'in-2 sei kompete ko'alia programa oinsá ita-nia konstrusaun estadu ba oin fó laran metin ba povu ida ne'e e garantia estabilidade ba ita-nia rai liliu prosesu kampaña iha koresma laran ita hotu hakmatek lalika iha palku leten ne'ebé mak ita insulta malu, ataka malu maibé ita promove demokrasia ida ne'ebé sivializadu, demokrasia ida ne'ebé ita rekoñese katak povu mak hun, povu mak abut, povu maka na'in ba ukun e konfiansa povu mak bele transfere ba sai Prezidente Repúblika”, dehan nia.
Ba Tribunál Rekursu (TR) iha loron tersa (29/03) deklara Kandidatu Prezidente Repúblika (PR), José Ramos Horta okupa pozisaun dahuluk no Kandidatu Francisco Guteres ‘Lú Olo’, iha pozisaun daruak iha eleisaun primeira volta hakat ba Eleisaun Prezidensiál Segunda Volta, ne’ebé sei realiza iha loron 19 fulan-abril 2022.
Rezultadu finál eleisaun Prezidénsia Repúblika (PR) períodu 2022-2027 primeiru volta nian ne'ebé mak kompete husi kandidatu na'in-16, TR válida hodi deside kandidatu na’in-rua hetan votu barak liu hanesan Kandidatu Prezidente Repúblika (PR) Jose Ramos Horta ho votu 303.477 (46,6%), no Francisco Guterres ‘Lú Olo’ ho votu 144.282 (22,1%), avansa ba segunda volta.
Antes ne’e, Prezidente Partidu Congresso Nacional de Reconstrução de Timor (CNRT), Kay Rala Xanana Gusmão lori CNRT kandidata Premiadu Nobel da Paz, José Ramos Horta, ba Prezidente Repúblika períodu 2022-2027, hodi realiza mehi ho rekezitu ne’ebé hatur, maibé la konsege hetan votu metade husi votu validu iha primeira volta.
Tanba informasaun ne'e www.tempotimor.com asesu liuhusi mídia CNRT katak, Konferénsia Nasionál CNRT ne’ebé hala’o iha loron 23 Janeiru 2022 deside hili Laureadu Nobel da Paz, José Ramos Horta sai Kandidatu CNRT nian ba Prezidente Repúblika (PR) períodu 2022-2027.
Desizaun Konfresista ne’ebé depozita konfiansa ba José Ramos Horta, tanba Kandidatu ne'ebé priense duni rekizitu sira CNRT hatuur ona.
Husi rekizitu sira ne’e hanesan, Prezidente Repúblika komprometidu atu respeita no halo tuir de’it saida mak Konstituisaun RDTL haruk. Hatuur fali orden konstitusional ne’ebé politiku má-fé sira sobu no estraga tiha ona.
Prezidente Repúblika eleitu komprometidu atu hatuur hikas lejitimidade no dignidade orgaun Parlamentu Nasionál ne’ebé partidu ambisiozu sira halo asaltu Poder hodi sobu orgaun ida ne’e iha 19 maiu 2020.
Nune’e Prezidente Repúblika eleitu komprometidu atu restaura fali lejitimidade no funsionamentu normal orgaun Governu ne’ebé dezde 2020 la-funsiona ho normal ne’ebé rezulta ekonomia rai laran hakdasak ba beibeik.
Iha ne’e mós Prezidente Repúblika eleitu komprometidu atu halo reforma iha setór judisiáriu nune’e bele garante no asegura aplikasaun Lei no Orden, liliu bele garante justisa tuir Konstituisaun no Lei sira haruka.
Rekezitu ikus liu Prezidente Repúblika eleitu komprometidu atu lahalo Prezidensia Repúblika sai fali opozisaun ba Governu, nune’e Governu tuir mai bele atinje Estadu tomak nia objetivu atu dada Kadoras Greater Sunrise mai Timor-Leste.
Hafoin deside José Ramos Horta sai kandidatu husi CNRT nian, delgadu sira ne’ebé tuir Kongresu komprometidu atu halo esforsu hodi garante vitória ba José Ramos Horta iha eleisaun Prezidensiál. (*)
