Tanba Primeiru Ministru (PM), Jenerál Taur Matan Ruak, ne’ebé aprezenta ona karta lisensa anuan husi loron 1 to’o 20 abril no tama fali servisu iha loron 21 fulan-abril.

“Sim ohin, hasoru malu ho eselénsia PM, liga ho eselénsia ninia lisensa durante semana rua ho balun, ba kampaña nia, tanba ne'e mak eselénsia fó hela orientasaun bele asume hela kargu interinu ba eselénsia Primeiru Ministru nia”, dehan Armanda Berta, hafoin hasoru malu ho PM, iha nia rezidénsia, Farol, kinta (31/03).

Ba orientasaun servisu ne'ebé vise Primeiru Ministra simu husi PM Taur mak sei haree liuba servisu hotu ne'ebé hala'o durante ne'e.

“Orientasaun ne'ebé ha'u simu husi Primeiru Ministru mak haree ba fatin no servisu sira ne'ebé ligadu ho Primeiru Ministru nia, ne'ebé durante ne'e hala’o ba ne'e”, informa nia.

Primeira Ministra Interina, Armanda Berta ne’ebé sei lidera Governu durante semana rua nia laran husi loron loron 1 fulan-abril to’o loron Primeiru Ministru Taur Matan Ruak, hala’o fali kna’ar.

Entretantu, Primeiru Ministru (PM), Taur Matan Ruak, informa ona ba Prezidnete RepúblikaFrancisco Guterres ‘Lú Olo’, kona-ba lisensa ne’ebé foti hodi ba partisipa kampaña kandidatu Lú Olo, ne’ebé hahú husi loron 2 to’o 16 abril 2022.

“Enkontru ida ke aproveita de'it ohin serimónia Tomada pose membru Governu nian, hatete ba sua eselénsia Prezidente katak ha’u lisensa atu partisipa kampaña”, dehan Taur hafoin enkontru ho Lú Olo iha Palásiu Prezidensiál, Bairopite, kinta (31/03).

Maibé kona-ba loron paskoa ne'ebé mak sei monu iha fulan-abril nian laran, depende ba konsiésia husi kandidatu ida-idak nian, nu’udar kristaun katóliku, atubele respeitu oráriu ne'e.

“Tanba dehan kuandu muda ne'e labele, mais konserteza ke to'o dia 14-15 ne'e ema hothotu la'o, bem ha’u rasik mós ba akompaña mais iha loron ne'e ha’u sei deskansa”, afirma Taur. (*)