"Ohin ha'u mai, reprezentante Governu fahe komputadór-ida no printer-ida ba Suku 59 iha Munísipiu Baukau," dehan Ministéiru Administrasaun Estatál (MAE) Migúel Pereira de Carvalho iha resintu Asministrasaun Baukau, kinta loraik (31/03).
Fasilidade komputadór no printer ne'ebé fahe ba kada Suku iha Teritóriu Nasionál, hanesan programa ida husi oitavu Governu konstitusionál antes termina mandatu iha tinan-2023.
Tanba ne'e, iha tinan-2022 Governu ho nia programa rasik fahe komputadór no printer ba kada Suku iha Teritóriu Nasionál hamutuk 452.
"Distribuisaun ékipamentu (komputadór no printer) hanesan parte ida atu moderniza funsionamentu Administrasaun Suku sira iha Timor-Leste tomak," nia afirma
Alden ne’e, oitavu Governu konstitusionál iha ona planu atu halo mós reabilitasaun ba Sede Suku hotu, ne’ebé hamutuk 452 iha Teritóriu Nasionál, tanba hahú konstrui kedas iha tinan-2006 to’o agora kondisaun a'at ona.
"Antes termina mandatu ida ne'e, minimu sede Suku hotu-hotu iha Timor-Leste tenke reabilitadu," nia hatete
Reabilitasaun atu instala ékipamentu sira ne'ebé fahe ona hodi Autoridade sira bele atribui kompetensia tuir lei nu.09/2016.
Tanba lei ne'e, atribui ba suku sira atu servisu ho administrasaun lokál no sentral hodi fó interese komun ba populsaun hotu iha kada Suku.
"Agora kada suku sira servi populasaun enjerál iha teritóriu timor laran tomak, ne'e prezisa ita fasilita sira," nia hatete
Suku ne'ebé seidauk asesu eletrisidade, Governu sei buka meius fonte eñerjia seluk hanesan solar selo no jeradór atu fasilita servisu.
Tanba, iha tinan-2022, Governu liuhusi Konsellu Ministru (KM) eleva ona insetivu lideransa komunitáriu kompara ho tinan kotuk.
Nune'e, Prezidente Autoridade Baukau, Olivio Freitas, hatete, Governu esforsu hodi sosa komputadór 452 ba Suku sira iha teritóriu nasionál atu mellora Xefe Suku sira nia atendementu ba públiku.
"Ita simu, la'os atu ba joga de'it, maibé atu servisu," nia argumenta
Xefe Suku Umanaulu, Postu Venilale, Vicente de Sousa Boavida, sente kontente ho esforsu ne'ebé oitavu Governu konstitusionál halo hodi distribui lona materál eletróniku ba kada Suku.
"Ba ha'u sente kontente, tanba durante ha'u ba periodu tolu ona, maibé foin primeira vez simu komputadór ba sede suku," nia hatete
Tanba, durante fó atendementu ba komunidade uza de'it komputadór empresta no uza mákina (mesin ketik), maibé ékipamentu komputadór no printer ne'ebé Governu fasilita ona, sei hala’o servisu di'ak liután. (*)
