Tempotimor (Dili)-Sekretáriu Jerál Partidu Frente Revolusionáriu Timor-Leste no Independente (FRETILIN), Mari Bim Amude Alkatiri, la fiar Kandidatu Prezidente Repúblika, José Ramos Horta, hatete Prezidente Partidu CNRT, Kay Rala Xanana Gusmão, konkorta Taur Matan Ruak kontinua Primeiru Ministru (PM) to’o tinan 2023, tanba ne'e labele disolve Parlamentu Nasional.

“Se la to’o rohan tanba saida, ho maioria ke resistente Governu ida ne'e, laiha ne'e la’ós to'o rohan de'it. Nia (José Ramos Horta) bosok ten, ha'u mak dehan duni, nia hatene nia labele disolve ne'e mak nia agora tenta fali dehan ba Jenerál Taur Matan Ruak katak Xanana konkorda atu nia kontinua Primeiru Ministru to'o 2023”, dehan Alkatiri hafoin partisipa serimónia tomada pose Membru Governu foun na'in-rua iha Palásiu Prezidensiál, Bairopite, kinta (31/03).

Ho deklarasaun ne'ebé Horta aprezenta atu disolve Parlamentu Nasionál (PN) ne'e, Alkatiri konsidera hanesan deklarasaun ida atu amaeasa de'it, tanba nia koiñese di'ak Ramos Horta.

“Kuandu nia ko’alia buat ne'e, ha’u dehan ne'e nia atu halo ameasa de'it, para bele haree se ema balun iha aliansa, plataforma atu muda ba novo maioria, ha'u koiñese, ami na'in-rua koiñese malu di'ak, nia la koiñese ha'u, ha'u koiñese nia”, deklara Alkatiri.

Durante tinan haat estabilidade governasaun ida ne'e ladun la'o di'ak, tanba tinan rua hamutuk ho Xanana Gusmão, maibé sé mak hatun Governu ne'e la'ós partidu FRETILIN.

Tanba bainhira situasaun akontese iha tinan rua nia laran, depois FRETILIN ba tama iha Governu, maibé ida ne'e hasoru pandemia, kalamidade, serka sanitária, buat sira ne'e hotu mak impede Governu la konsege hala'o dezenvolvimentu iha rai laran.

“Buat sira ne'e hotu mak desizaun ne'e kuandu dehan laiha dezenvolvimentu ka dezenvolvimentu kuandu la akontese iha terenu tanba situasaun ida ne'e”, hatete nia.

Maibé entermu instituisionál no programa ne'e Governu iha, no hein de'it momentu ida atu aranka de'it, tanba realidade hatudu ona agora de'it ezekusaun ba dezenvolvimentu kuaze 60 pursentu la'o hela.

“Di'ak liu, ou la ezekuta kuandu laiha kondisaun, osan hela iha ne'eba, duke ezekuta hanesan uluk $16 billaun dolar laiha rezultadu”, dehan nia. (*)