Rerezentante Ekipa Susesu Kandidatu Horta, Tomas Cabral hatete, sira-nia parte garante kandidatu ho númeru sorteu 1 José Ramos Horta sei manán tanba realidade hatudu ona iha primeiru volta.

“Númeru 1 sempre primeiru pois mak ba kotuk, halo nusa mak 1 ba fali kotuk, númeru 1 ne'e iha oin, sempre la'o nafatin ba oin, se ba oin ona nusa mak nia ba fali kotuk”, dehan nia hafoin partisipa anusiu rezultadu númeru sorteu iha Tribunál Rekursu (TR), Kaikoli, kuarta (30/03).

Iha eleisaun primeiru volta, Kandidatu José Ramos Horta, konsege hetan votu 303.477 (46,6%), hatudu esforsu tomak ne'ebé sira hala'o sei la'o ba oin no la'ós ba kotuk.

Reprezentante Ekipa Susesu Kandidatu Lú Olo, Fernando Gusmão hatete, sira-nia parte laiha pronlema kona-ba númeru sorteu ne'ebé mak atribui husi Tribunál Rekursu tanba atu hetan vitoria ne'e presiza esforsu halo servisu másimu.

Tanba ne'e, ekipa susesu sei hala'o servisu no halo kontaktu ho aliadu sira iha baze, oinsá bele esforsu hamutuk hodi lori vitoria ba kandidatu Lú Olo.

“Não iha eleisaun bara-barak liuba ne'e, foin dadauk ne'e ita haree númeru 1 la hetan buat ida, ho númeru 2 mós la'e, númeru kotuk mak hetan, ne'e hatudu katak so servisu maka’as mak bele fó vitória”, hatete nia.

Tanba ne'e, nia parte husu atu reprezentante ekipa susesu sira iha baze servisu maka’as, organiza povu, tanba povu mak sei fó konfiansa iha momentu eleisaun no garante vitória. (*)