Print this page

CNC Avalia Planu Estratejiku Anual Husi 2021-2025

Diretór Ezekutivu Centru Nasional Chega (CNC), Hugo Maria Fernandes. Diretór Ezekutivu Centru Nasional Chega (CNC), Hugo Maria Fernandes. Foto Tempo Timor

Tempotimor (Dili)-Centru Nasional Chega (CNC) hala’o hela avaliasaun ba planu Estratejiku annual ba tinan 2021-2025.

“Ohin iha atividade regular CNC ninian, nu'udar parte boot ida husi programa boa governasaun ho jestaun insititusionál ho mós parseria nian, ida ne'e ami halo kada fulan tolu”, dehan Diretór Ezekutivu Centru Nasional Chega (CNC), Hugo Maria Fernandes, ba jornalista sira iha salaun CNC, Antigo Komarka Balide, Dili, segunda (28/03).

Tanba kada trimestrál CNC konvida parseiru estratejiku sira mai husi liña ministerial, organizasaun sosiedade sivíl, ne'ebé mak durante halo servisu hamutuk CNC.

“Normalmente iha atividade enkontru ho parseria, ami ko'alia kona-ba saída mak halo hamutuk, por ezemplu ho RTTL.ep ita asina ona nota intendimentu. Saida mak ita atinje ona iha 2021 e depois sa mak ita atu halo iha tinan ida ne’e nian, ne’e mak ami ko’alia”, afirma nia.

Iha parte segundu atu hamutuk diskute kona-ba dezafiu ruma, karik durante sira-nia parseria ne'e dezafiu saída de’it mak CNC hasoru, entaun dezafiu insititusionál sira ne'e mak diskute hodi nune'e buka solusaun hamutuk hodi hasa'e persentajen CNC nia atividade.

“Iha trimestrál primeiru, 2022 ita atu hatete deit, iha implementasaun atual programa nian, ita bele hatete foin la’o to’o 10 to’o 15%, tanba janeiru, fevereiru maioria tempu ami haree ba sasán administrasaun nian”, dehan nia.

Ba atividade sira ne'ebé mak CNC realiza ona iha trimestre primeiru mak konsege entrega xave uma ba sobre vivente sira iha Munisípiu balun, nune'e mós iha kooperasaun di'ak ho Ministériu Administrasaun Estatál durante ne'e.

“Dadaun ne’e CNC halo parseria ne’ebé di’ak tebes ho Ministériu Administrasaun Estatal (MAE) liuhusi programa PNDS, ita bolu sira introduz Uma Kbi’it La’ek (UKL) bazeia ba kooperasaun ida ne’e mak ita iha, ita hatama lista kuaze 500 sobrevivente bele iha poténsia simu uma UKL, luihusi prograna PNDS”, akresenta nia.

Aleinde ne'e mós, kria kooperasaun ho Ministériu Ensino Superior Siensia no Kultura (MESSK) no Ministériu Edukasaun hodi dezenvolve kurikulu ba materia istória nian hodi fasilita estadunte universitáriu, estudante primária no sekundáriu hodi bele hatene istória Timor nian.

“Parseria di’ak mós ho Ministériu Ensino Superior Siénsia no Kultura (MESSK) ne’ebé mak iha tinan kotuk ho tinan ida ne'e ita dezenvolve hela kurrikulu ba matéria istória ba universidade hothotu, hein katak tinan ida ne’e ita bele kompleta, Ministériu Edukasaun (ME) liliu kurikulu ba ensino primária ba sekundáriu ita kompleta ona agora ita hein finalizasaun”, akresenta nia.

Maibé CNC mós hala'o kooperasaun ho Sekretáriu Estadu Arte no Kultura (SEAK) halo programa hamutuk ba lejislasaun sitiu istóriku sira. Ministériu Saúde CNC halo ona konkordánsia liuhusi MoU, agora faze finalizasaun, atu haruka lista sobrevivente sira ne'ebé mak durante ne'e moras ba postu saúde, ospitál sira para depois sira bele tratamentu di’ak.

Iha ne’e, CNC mós kria kooperasaun di'ak ho AJAR Timor-Leste no AJAR Internasionál hodi kontinua buka tuir ema lakon iha tempu okupasaun Indonázia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items