Print this page

Lere ‘Lakohi’ Impede Liberdade husi Apoiante

Eis Kandidatu Prezidente Repúblika (PR) períodu 2022-2027, Lere Anan Timur. Eis Kandidatu Prezidente Repúblika (PR) períodu 2022-2027, Lere Anan Timur. Foto Suplay

Tempotimor (Dili)-Eis Kandidatu Prezidente Repúblika (PR) períodu 2022-2027, Lere Anan Timur, ‘lakohi’ impede liberdade husi ninia apoante sira, iha eleisaun segunda volta, tanba nia apoiante sira iha eleisaun primeira volta, mai husi partidu, organizasaun no movimentu oioin.

Ba Kandidatu Prezidente Repúblika, Francisco Guterres 'Lú Olo' no Kandidatu José Ramos Horta, ne'ebé hakat ba segundu volta eleisaun prezidensiál iha loron 19 fulan-abril, maibé Lere rasik seidauk fó apoiu, maibé sei hili kandidatu ida ne’ebé tuir nia prinsípiu promove diálogu, unidade nasional no rekonsiliasaun ba dezenvolvimentu nasionál.

“Ba ha'u-nia apoiante sira ha'u fó liberdade tanba foin dadauk ha'u-nia apoiante la'ós partidu ida de'it mak apoiu ha'u, FRETILIN rasik mós apoiu ha'u, partidu sira seluk hanesan organizaun de masa, organizasaun rituál, arte marsiál hothtou apoiu ha'u, e ohin loron ha'u fiar se mak FRETILIN fila ba FRETILIN, se mk PLP fila ba nia partidu, se mk KHUNTO fila ba nia partidu, ida-idak ba nia organizasaun konsiénsia mak sei rekomenda ba ema ida-idak atu hili ba se”, dehan Lere liuhusi konferénsia Imprensa iha sede Nasionál Pantai Kelapa, tersa (29/03).

Maibé agradese ba ekipa sira husi nível nasionál, munisípais, postu administrativu, suku no aldea, ne'ebé apoiu ona nia kandidatu iha eleisaun primeiru volta.

“Ha'u hakarak agradese ba ha'u-nia ekipa susesu, a nível nasionál, munisipál, postu administrativu, suku no aldeia, agradese mós mídia, ha'u-nia protokolu, ha'u-nia Brigada, fiskál, doador, apoiante ba ha'u-nia kandidatu”, deklara Lere.

Tanba apoiante sira ne’ebé hamutuk ona nia iha tempu difísil durante jornada polítika, hodi kandidata-an ba Prezidente Repúblika, maske la hetan apoiu husi nia partidu sira seluk no FRETILIN rasik.

“Ha'u-nia kamadara sira, ha'u-nia kompañeru, ha'u-nia maluk sira ne'ebé mai hotu, iha tempu ne'ebé difísil tebes, iha ha'u-nia jornada polítika, biar ha'u sai oankiak ba partidu barak, biar ha'u sai oankiak ba ha'u-nia partidu rasik FRETILIN, maibé imi la husik ha'u, biar ha'u komesa tarde, biar ha'u osan laiha maibé imi nafatin hamutuk ho ha'u”, afirma nia.

Iha ne’e hato’o agradesementu espesiál ba veteranu tomak, oankiak, jerasaun rezisténsia ka jerasaun patriota, feto faluk sira, ai-leba no ain tanan sira, organizasaun rezisténsia sira, organizasaun masa sira, organizasaun rituál no organizasaun arte marsiál sira.

“Militante partidu barak nian, espesiál ba militante partidu FRETILIN ne'ebé konsidera nafatin ha'u hanesan sira-nia lideransa ida, aman ida ne'ebé fiar iha ha'u-nia plataforma polítika no intensaun di'ak atu lori valór libertasaun FRETILIN nian ba povu doben ida ne'e”, hatete nia. (*)

Rate this item
(0 votes)
Last modified on Wednesday, 30 March 2022 10:48
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items