"Barak mak kestiona liliu ha'u-nia apoiante sira, husi estrutura to'o baze, ha'u apoiu los kandidatu ida ne'ebé?. Mais ha'u kaer husi ha'u-nia prinsipiu katak, ha'u promove diálogu, promove unidade, estabilidade atubele kria dezenvolvimentu iha ita-nia rai laran, ha'u hili líder ida ne'ebé mós tuir ha'u-nia prinsípiu promove diálogu, promove unidade nasionál, rekonsiliasaun, estabilidade ba ita-nia rai", dehan Lere liuhusi konferénsia Imprensa iha Sede Nasionál Pantai Kelapa, tersa (29/03).

Tanba ne'e Lere lakohi bainhira kandidata Prezidente Repúblika ida sai prezidente atu ukun ho vigansa no ukun hanesan opozisaun ba ema seluk, maibé presiza servisu hamutuk.

“Ha'u lakohi para ita kuandu ukun la bele ukun ho vigansa, ita kuandu ba ukun la bele sai opozisaun ba ida seluk, maibé hothotu tenke servisu hamutuk hodi bele lori ita-nia nasaun ba oin", hatete Lere.

Nune'e, kandidata Lere deklara to'o agora nia seidauk foti pozisaun atu apoiu kandidatu Prezidente Repúblika, Francisco Guterres'Lú Olo' ka kandidatu José Ramos Horta.

"Ha'u deklara katak to'o agora ha'u seidauk iha pozisaun ida atu apoiu kandidatu A ka kandidatu B, sese mak ukun ba ha'u problema laiha, mesak timoroan mak ukun, importante mak ukun rai ida ne'e, sai líder ba rai ida ida ne'e hanesan aman ba nasaun ida nu'udar Prezidente Repúblika tenke haku'ak ema hothotu, tenke haku'ak líder hothotu", afirma nia.

Tanba haree ba situasaun agora, konfigurasaun líder mai husi líder istóriku sira mak kompete ba malu iha eleisaun ne’ebé mai.

"Hanoin katak sira iha konsiénsia tomak katak sira sei promove diálogu, sei promove unidade nasionál, rekonsiliasaun e kria mós estabilidade iha ita-nia rai laran, e até agora komentáriu kritika sira ne'ebé mosu ha'u seidauk marka ha'u-nia pozisaun se mak ha'u sei kandidatu. Ha'u bele dehan katak se ha'u la kandidata Lú ka ha'u la kandidata Ramos Horta, sira ida mak ukun, ha'u hanoin katak Timor nia oan, Timoroan mak ukun”, katak nia.

Maske deklara-an hanesan ema FRETILIN, maibé Lere apela ba nia apoiante sira tomak katak, seidauk toma pozisaun ida atu apoiu kandidatu ida, tanba lakohi foti desizaun hotu apoiu kandidatu ida hodi minimiza Kandidatu seluk.

"Ha'u até agora seidauk toma pozisaun ida atu apoiu se, mas jornalista sira bele husu ita-boot FRETILIN ninian, ya ha'u FRETILIN, maibé ha'u líder nasional ida, ha'u la'ós kualker líder, ha'u líder nasional tanba ha'u fakar ha'u-nia rán ba rai ida ne'e, ha'u lider rezisténsia to'o funu hotu, tanba ida ne'e mak ha'u lakohi apoiu ida seluk e minimiza ida seluk, maibé ha'u apela de'it ba lider kandidata ba Prezidente Repúblika promove diálogu, unidade entre líder hothotu, unidade líder ho nia povu, povu ho líder, la bele sai opozisaun", afirma Lere.

Ba eleisaun segunda volta ne’ebé tuir kalendáriu sei realiza iha loron 19 fulan-abril, tanba ne’e Lere sei anunsia apoiu kandidatu ida iha tempu tuir mai.

"Ha'u hanoin dia 19 mak eleisaun, be sei lori tempu kuaze ke fulan ida, ha'u hanoin sei tempu ha'u sei anunsia, ha'u apoiu se se, ha'u sei deklara", relata Lere.

Maibé pozisaun Kandidatu Francisco Guterres 'Lú Olo' no José Ramos Horta hanesan líder nasionál tanba ne'e Tenete Jenerál Reformadu Lere Anan Timor sei sukat no tetu didi'ak atu deklara fó apoiu.

"Ha'u seidauk iha opozisaun ida atu apoiu Lú Olo ka Ramos Horta, ha'u seidauk deside, sira mesak líder nasionál, líder rezisténsia, ne'e la'ós joven ida, se joven ida karik, ha'u dehan ha'u prefere apoiu líder nasionál ida duke ha'u apoiu joven ida, mas sira mesak líder nasionál, ha'u sei sukat, ha'u sei dasi, ha'u sei estuda ida ne'ebé mak ha'u apoiu", reafirma Lere. (*)