“Medidas seguransa husi autóridade seguransa sempre iha, tanba iha segundu ronde ne'e ita haree katak kandidatura na’in-rua de'it mak sei kompete, klaru que ita kontinua nafatin servisu hamutuk ho autóridade hothotu, inklui ita-nia kandidata prezidente sira-nia team susesu, no ida ne'e ita garante ona katak eleisaun segunda volta la'o di'ak, e ita sei prefere liuba asidente sira ne'ebé iha ronde dahuluk ne'e hodi mellora liután kapasidade”, afirma Superentidente Antonio, hafoin enkontru avaliasaun Komandu PNTL Munisípiu 13, iha Timor Plaza, segunda (28/03).
Maibé difikuldade ne'ebé PNTL Munisípiu Baukau hasoru iha terenu hodi difikulta serbisu iha eleisaun prezidensiál hanesan limitasaun rekursu umanu, ekipamentu transporte no kondisaun estrada.
“Difikuldade ne’ebé durante ne'e ita enfrenta iha terrenu mak, limitasaun rekursu umanu, rekursu ekipamentu transporte, kondisaun dalan la di'ak, ida ne'e mak difikulta tebes servisu iha terenu, bainhira tula sasán sensitivu sira tama sai suku, nomós ema ne'ebé la to’o, tanba ita-boot sira hatene kapitál Baukau ne'e segunda kapitál, hafoin de Dili”, dehan nia.
Maske rekursu umanu maibé PNTL Baukau kontinua nafatin garante seguransa iha prosesu kampaña eleitorál to’o eleisaun prezidensiál primeiru volta ne’ebé liu ona no sei kontinua nafatin ba segunda volta.
“Ita iha menus rekursu umanu, maibé ita espera que ba segunda volta ne'e ita sei mellora liután, kondisaun sira ne'e, para ita trasa estratéjia atu nune'e asegura liután eleisaun segunda volta mai ne'e, la'o iha ambiente ne'ebé mak paz pasifikamente, ida ne'e mak ita-nia espetativa”, espera nia.
Tanba iha segundu volta ne'e iha kandidatura rua mak sei kompete, nune'e kona ba seguransa nia, PNTL sempre garante hodi hadi’a liután fallansu sira ne'ebé hasoru iha eleisaun prezidensiál reda dahuluk ne'ebé ultrapassa ona. (*)