Konferénsia Nasionál Partidu Libertasaun Populár (PLP) nian ho tema ‘Timor tenke ba oin’ maske kovida Lere Anan Timur (LAT) atu halo diskursu aberta, maibé la maka prezensa.

Tuir observasaun www.tempotimor.com iha terenu nota, iha konferénsia ne’e, marka prezensa husi Sekretáriu Jerál Partidu FTEITLIN, Mari Alkatiri, Konselleiru Supremu Partidu KHUNTO, José dos Santos ‘Naimori Bucar’ no Prezidente Partidu Libertasaun Popular (PLP), Taur Matan Ruak, maibé fatin ba Tenente Jenerál Formadu, Lere Anan Timur, mamuk.

Tuir informasaun ne’ebé fó sai husi Prezidente Internu PLP, Abão José Freitas ‘Mate Restu’, iha konvite ne’ebé www.tempotimor.com asesu katak, partisipasaun líder Partidu no líder Nasaun sira iha Konferénsia Nasionál, sei halo diskursu aberta no akompaña diskusaun politika nomós desizaun ne’ebé sei foti husi PLP iha Salaun Madre Kanosiana Has-Laran Manleuana, Dili.

Ho Konferensia Nasionál ne'e, hato'o hakuak boot no esperansa ba mudansa progresu rai doben Timor-Leste nian. Nune’e konsidera dinámika politika eleisaun Prezidente Repúblika tinan 2022-2027.

“Sim ajenda ne'e ofisiál, aban ita-boot sira ba koobertura”, dehan Prezidente Interinu PLP, Abrão José Freitas ‘Mate Restu’ liuhosi telefone ba www.tempotimor.com sábadu (26/03).

Nune’e, sei dezafia konjuntura politika nasionál no estabilidade politika, tanba ne'e mak liuhusi lideransa másimu Prezidente Partidu PLP Jenerál Taur Matan Ruak hakarak konvida lider partidu no membru kuadru partidu sira atubele partisipa iha konferensia. (*)