LIKISA – Suspeitu ida ho naran inisial MSG tenta atu sobu komisiu ka kampaña partidu Alliansa Mudansa ba Progresu (AMP) iha munisipiu Likisa hafoin hetan intervensaun imediata hosi parte seguransa.

Jornalista Tempo Timor, observa iha komisiu AMP nian ne’ebé hala’o iha kampu futebol Likisa iha loron Sabádu, 20 Abril liubá katak, molok prezidente AMP, Kay Rala Xanana Gusmão, portavoz AMP, Taur Matan Ruak, no konseleiru AMP Naimori tama ba kampu laran, iha horas tuku 2 lorokraik derepente suspeitu MSG ho nia kareta koor kinur ida halai maka’as tama ba kampu laran no tenta atu sobu komisiu ne’e, maibé lakonsege, tanba militante no simpatizante AMP nian ka’er metin tiha, no la kleur de’it polisia mós to’o fatin akontesementu hodi ka’er suspeitu ne’e no sulan iha sela detensaun hodi submete ba prosesu investigasaun tuir mai.

Liu tiha ida ne’e, polisia tranzitu mós lori kedas suspeitu nia kareta ba edifisiu polisia Likisa nian nu’udar sasan evidensia ida, no mosu informasaun barak katak iha sasan kroat mak nakonu iha kareta laran, maibé Segundu Komandante Polisia Likisa, Superintendente Asistente Eduardo Campos rejeita total informasaun ne’e, tanba rezultadu investigasaun hatudu kareta laran mamuk. Laiha sasan kroat seluk tan.

“Evidensia kareta mak ami tahan, maibé sasan sira seluk ne’ebé deskonfia sasan kroat iha laran ne’e laiha,” hatete komandante Campos via telemovel ba Tempo Timor, Sábadu (21/04).

“Situasaun ita kaptura nia, nia tentativa atu halo krime ita ka’er nia ita prosesa tuir lei. Suspeitu ne’e agora sei iha hela komando, tanba Segunda sei aprezenta ba iha Ministériu Públiku. Ita prepara hela atu lori nia ba Ministériu Públiku. Evidensia hotu iha ami nia office”.

“Tentativa ne’e nia tama ba lori kareta atu provoka situasaun, la’ós tentativa atu oho ema. Provoka situasaun, tanba nia la’ós militante partidu AMP nian, depois nia tama to’o ne’eba ba to’o palku nian ne’e intensaun saida?”.

Maske mosu tentativa ida ne’e, maibé komisiu AMP nian iha loron Sesta liubá la’o ho susesu to’o remata. (Oki)