“Enkontru semanal ho sua eselénsia Prezidente Repúblika ko'alia liliu asuntu rua de'it, ida mak preparativu ne'ebé ita halo eleisaun Prezidensiál segundu volta nian no ida seluk ko'alia kona-ba Covid-19, ita-nia esforsu ba hanusa mak kontinua halo kampaña vasinasaun”, dehan nia hafoin hasoru malu ho PR Lú Olo iha Palasíu Prezidensiál Bairopite, kinta (24/03).

Enkuantu Governu sei esforsu maka’as atu hadi’a estrada sira ne'ebé dezastre naturál sobu nune'e bele fasilita iha eleisaun segundu Volta ne'e ho di’ak liután.

“Ami haree hela, esforsu saida mak bele halo para ke ajuda liliu fatin sira ne'ebé dadaun ne'e tuir dezastre naturá estraga tiha ona estrada sira, para bele fasilita iha segundu volta ne'e”, hatete Taur.

Ba preparativu sira ne'e husi STAE, CNE servisu maka’as, Governu ninia apoiu mak halo hanusa atividade sira ne'e bele la'o di'ak, nomós reforsa seguransa iha sira-nia atividade sira ne'e para ke la bele iha problema.

“Hanesan ita-boot sira hatene eleisaun foin lalais ne'e iha difikuldade balun ita-nia sira, liliu iha sentru votasaun paralelu sira ne'e, taun ami haree hela ida ne'e hanusa mak ajuda sira tenke filafali ba sira-nia fatin para bele partisipa iha festa Demokrasia ne'e”, esplika nia.

Kona-ba orsamentu la problema, Governu iha orsamentu ba eleisaun tantu ba primeiru volta no segunda volta ne’ebé preve ona.

Ba kandidatu sira ne'ebé sei kompete iha eleisaun Prezidensiál, hanesan kandidatu José Ramos Horta husi partidu CNRT no Kandidatu Francisco Guterres 'Lú Olo' husi partidu FRETILIN. (*)