Ministru Prezidensia Konsellu Ministru (MPKM), Fidelis Leite Magalhães eplika, planu lejizlativu ne’e elabora ona tuir proposta ne’ebé submete husi membru Konsellu Ministrus sira no konsiste iha previzaun husi intervensaun lejizlativa sira Governu nian no prioridade sira-ne’e, ne’ebé fahe tuir setór sira, ba tinan 2022.
“Planu lejizlativu ne’e hanesan instrumentu ida-ne’ebé konsagra ona ba hadi’ak kualidade atividade lejizlativa Governu nian”, dehan nia iha Palásiu Governu.
Iha ne’e aprezenta mós kona-ba opsaun polítika sira kona-ba matéria sira ba jestaun rekursu umanu sira iha Administrasaun Públika.
“Asuntu tolu ne’ebé aprezenta mak implementasaun ba idade reforma obrigatóriu ba funsionáriu públika, rejime formadór no kestaun dezenvolvimentu rekursu umanu sira iha funsaun públika no alterasaun lei orgánika Institutu Nasionál Administrasaun Públika nian, ne’ebé habadak ho naran husi INAP”, informa nia.
Alien ne’e, Ministru Koordenadór Asuntus Ekonómikus, Joaquim Amaral, mós halo aprezentasaun ida kona-ba proposta sira investimentu privadu nasionál no internasionál sira ne’ebé eziste iha setór telekomunikasaun sira, hodi halo ligasaun fibra ótika ba Timor-Leste. (*)