“Bainhira povu tomak vota tanba simu osan no hetan ameasa oioin, Bainhira eleisaun hala'o nakonu ho intimidasaun no fraude, ita hotu tenke hamrik no hasoru dezafiu sira hanesa ne'e tanba, laiha dalan atu husik liu sira ne’ebé uza osan atu aproveita povu nia ki’ak ba kontrola povu nia konsiénsia no na'ok povu nia voto”, deklara Alkatiti iha ninia pájina Facebook Mari Alkatiri, kuarta (23/03) ne'ebé www.tempotimor.com asesu iha kinta (24/03).
Alkatiri hatete, labele fó dalan ba koruptór ho koruptu sira atu sobu valór no prinsípius luta nian tanba de'it sira-nia ambisaun ba poder no moras ne'ebé halo sira kontente bainhira povu terus.
“Lalika hein tempu seluk atu hatudu ita-nia brani no ita hakribit ba sira. Mai ita hotu hamutuk atu defende prinsípius no valór luta nian atu kontinua prosesu libertasaun povu nian atu, hasai povu husi nakukun no kore povu husi mukit no ki’ak”, afirma nia.
Tanba ne’e, mai hamutuk hotu atu hatudu ba koruptór no trafikante ilegál sira katak sira-nia manipulasaun ne'ebé haree momos sei hatudu ba povu tomak atu povu rasik bele ezije sira atu responsabiliza ba sira-nia fraude eleitorál no krime oioin.
“Laiha dalan atu hakiduk. Mai ita hotu hasoru dezafiu boot ida ne'e atu fila lia los no hahú prosesu dezenvolvimentu”, haktuir nia. (*)