Tanba ko’alia kona-ba kampaña sei haree lai formatu kampaña saida, maibé hanoin pesoalmente lalika halo komísiu barak tanba povu mós kolen, lalin ba lalin mai husi Aldeia, Suku, Sub-distritu mai Munisípiu-Vila.
“Tempu sira presiza ba sira-nia servisu, sira-nia agrikultór, ou joven sira ba sira-nia estudu, profesionál sira, maibé ne'e desizaun seidauk halo, ne'e ha’u mós depende ba CNRT e apoiante sira seluk”, dehan Horta iha nia rezidénsia Farol, kuarta (23/03).
Maske desizaun Tribunál Rekursu seidauk fó sai rezultadu finál, maibé Kandidatu Horta hahú simu ona komunikasaun no kontaktu oioin husi eis kandidatu sira inklui Partidu Polítiku balun ne'ebé antes ne'e fó ona apoiu ba sira-nia kandidatu ne'ebé lakonsege hakat ba eleisaun iha segundu volta nian.
“Iha kontaktu oioin kada kandidatu balun, ita-boot sira hatene ne'e, agora ami na’in-rua kandidatu seluk, balun simu hanesan ha’u hatete ne'e, ha’u-nia kandidatura iha primeiru ronde kedas simu apoiu husi hothotu, agora tanba de'it iha kandidatu rua, ha’u ho Prezidente FRETILIN ‘Lú Olo’ buka de'it atu primeiru konsolida votasaun hetan iha primeira ronda, 300 itál mil, para haree se bele aumenta tán”, dehan nia.
Tanba ne'e, iha kandidatu balun mak hahú ko'alia ona maibé labele hatete klaru, tanba ne'e hanesan sira rasik husu labele fó sai, no sira mak sei komunika inklui kandidatu balun mós sei ko'alia sai ba públika kona-ba sira-nia pozisaun.
“Purtantu ha’u kontente loos ho rezultadu boot e ha’u konfiante ke votasaun sei konsolida aumenta tán iha segunda ronda”, hatete nia.
Maibé ba eleisau segundu volta ne'e, Horta prontu tun filafali ba baze, iha munisípiu Dili ka iha fatin ne'ebé de'it, atu nune'e konsolida votu bele aumenta.
“Kandidatu barak kontaktu ha'u rasik, iha partidu balun ke apoiu kandidatu mós kontaktu ona, e kontaktu kontinua ohin e aban, ho eis kandidatu e partidu politiku sira. Akordu polítiku laiha por enkuantu, sira ne'ebé mai ko’alia ho ha'u ne'e, sira mai para fó de'it apoiu ou hakarak rona buat seluk, ba sira atu apoiu ha’u ne'e sira apoiu ona”, afirma nia. (*)
