“Asisténsia ba votante sira ne'ebé mak iha nesesidade espesiál ami mós nota katak, sentru votasaun ne'ebé mak observasaun sira sempre fó asisténsia ba ema Difisiénsia sira, inan isin-rua, katuas no ferik sira para atu asegura sira mós asesu ba sira-nia direitu sira iha sentru votasaun ida de'it mak ami nota katak iha Dili inan isin-rua tenke forma fali ho liña naruk no ladún hetan atensaun husi ofisiál sira”, dehan Larry Fangawa ba jornalista sira iha Salaun G7+, Palásiu Governu, kuarta (23/03).

Ho nune'e nia rekomedasaun balun ne'ebé mak hakarak hato'o, presiza aumenta oituan tempu ba votasaun nomós modifika prosedimentu iha, kontajen ne'e rasik, atubele aumenta liután partisipasaun.

“Segundu ami mós sujere atu konta votu iha estasaun de votu, la'ós lori hamutuk ba tau iha sentru votasaun ida atu nune'e la presiza han tempu ne'ebé barak”, rekomenda nia.

Tanba ne’e, presiza iha kaixa transparánsia iha sentru votasaun ida hodi halo kontajen hodi fasilita eleitór sira iha sentru votasaun sira.

“Terseiru, sira mós nota katak ita-nia kaixa de votu ne'e kór azul, maibé ami mós atu rekomenda atu uza kaixa ne'ebé mak transparante atu nune'e promove transparánsia ema hotu asesu buletin votu ne'ebé tau atu ema hotu bele asiste ida ne'e”, hatete nia.

Maibé parte hothotu iha eleisaun ne'e la'o di'ak nune'e iha Rekomedasaun no sujestaun sira ne'ebé sira rekomenda esperansa Governu Timor-Leste sei hadi’a hodi di'ak liután.

Durante ne'e Ekipa G7+ iha observadór hamutuk na’in-10, iha na'in rua husi Afganistan, Siera Leone no Timoroan na'in-ualu.

Iha tempu eleisaun prezidensiál observadór sira ne'e ba observasaun iha Munisípiu Bobonaro, Baukau, Dili no Ermera no observa estasaun votu hamutuk 28 no uza materiál no informasaun ne'ebé hetan husi Sekretariadu Tékniku Administrasaun Eleitorál (STAE)

Antes ne'e observadores mós tuir sesaun briefing husi STAE atu komprende hodi halo observasaun, alende ne'e iha eleisaun Ekipa Observadór mós hetan kartaun kredensiál husi STAE rasik. (*)