Ministru Administrasaun Estatál (MAE), Miguel Perreira de Carvalho, hatete, eleitór ne'ebé mak naran laiha lista labele tuir votasaun iha sentru votasaun Paralelu.
“Ha'u hakarak adianta katak wainhira eleisaun prezidensiál ne'e mak avansa duni ba segundu volta mak sentru votasaun paralelu iha Dili laran ne'e, eleitór sira ne'ebé bele kontinua vota mak sira ne'ebé mak naran rejista ona iha sentru votasaun paralelu, no sira ne'ebé mak naran laiha lista ne’e, sira tenke ba vota iha ida-idak nia suku”, dehan MAE, Miguel Perreira de Carvalho ba jornalista sira iha Palásiu Governu, tersa (22/03).
Tanba estabelesimentu sentru votasaun paralelu rejista kuaze eleitór 4.030 ne'ebé mak vota iha sentru votasaun tolu hanesan iha STM-Bekora, GMT nomós INAP-Komoro.
Bainhira Eleisaun Prezidensiál atu avansa ba segundu ronde sei hein rezultadu finál ne'ebé mak sei anúnsia husi Tribunál Rekursu (TR).
Ba Sekretariadu Tékniku Admistrasaun Eleitorál (STAE) rejistu ona eleitór hamutuk 4.030 mai husi Munisípiu 12 no Rejiaun Administrativu Espesiál Oekussi Ambeno (RAEOA) mak vota iha sentru votasaun paralelu tolu (3) iha Dili.
“Eleitór hamutuk 4.030 rejista ona tanba ne’e foin lalais iha loron 19 marsu sira bele asesu iha sentru votasaun paralelu ne’ebé mak estabelese ona iha Dili”, afirma nia.
Nune'e sidadaun liliu estudante sira ne'ebé mak durante ne'e rejista ona iha sentru votasaun Paralelu, sira ne'e mak sei kontinua vota, iha sentru Paralelu maibé sira ne'ebé la rejistu sei filafali ba ida-idak nia Munisípiu. (*)