“Ha'u sente orgullu tebes bele fó tomada de posse ba membru na'in-4, ne'ebé señor Primeiru Ministru rasik propoin mai Prezidente Repúblika atu hola desizaun ida ne'e. Ha'u fiar metin katak liuhusi eskolla ne'ebé mak señor Primeiru Ministru propoin mai Prezidente Repúblika la sala hili nia membru sira, e prontu ho konfiansa tomak ne'ebé mak señor Primeiru Ministru fó e fiar metin katak sira hotu sei bele ajuda di'ak liután Governu ida ne'e hamutuk ho lei governamental ne'e tomak”, dehan PR Lú Olo iha Palasíu Prezidensiál Bairupite, tersa (22/03).

Nune'e deseza saúde di'ak nomós susesu ba membru na'in-4 hanesan Ministru Obras Públika, Abel Pires da Silva, Ministru Justisa, Tiago Amaral Sarmento, Vise-Ministru Finansas, António Freitas, Sekretáriu Estadu ba Assuntus Kombatentes Libertasaun Nasionál, Júlio da Conceição ‘Loro Messak’.

"Ha'u deseza nafatin saúde di'ak e mós susesu ba lei governamental ne'e tomak, partikularmente ba sira na'in-4 ne'ebé mak tama iha Governu ne'e tomak nia leet”, hatete Xefe Estadu.

Naturalmente hothotu sei servisu hamutuk nu'udar organ koletivu ida atubele la'o misaun ida inkonjuntu ba objetivu ne'ebé Governu konstitusional daualu atu atinje.

“Hela de'it tinan ida ho balun, mesmu sei tinan ida ho balun ita sei bele halo buat barak, ha'u fiar metin tanba ne'e duni ha'u deseza dala ida tan susesu”, informa nia.

Enkuantu PR Lú Olo deseza mós saúde di'ak ba Mari Alkatiri ho Konselleiru KHUNTO, José dos Santos ‘Naimori Bukar’, membru Governu tomak atu kontinua servisu hamutuk to'o Governu ne'e remata.

“Señor Mari Alkatiri iha ita hotu nia leet, ha'u deseza mós ita-boot nia saúde di'ak, señor Naimori ho señor Reprezentante husi partidu sira seluk ne'ebé prezensa iha ne'e, deseza ita boot sira hotu, hamutuk ho ha'u, hamutuk ho governu, ita hotu koopera para atu la'o nafatin ba oin ate ita-nia governu ida ne'e nia mandatu hotu", deklara PR Lú Olo.

Ministru Obras Públika, Abel Pires da Silva hatete, tempu ida ne’ebé edekuadu liliu oinsá atu aselera buat hotu ne'ebé maka presiza para bele serví povu di'ak liután hanesan prozetu prioridade sira infrastrutura nian, estrada no ponte.

“Ita hatene katak ita presiza halo rekoperasaun ba impaktu kalamidade, e mais importante maka oinsá atu halo esforsu para bele prevene impaktu kalamidade ne'e ba tinan oin sei la akontese boot liután, tanba udan ne'e sei mai tinan-tinan, maibé ita mak tenke iha esforsu para oinsá halo prevensaun, ida ne'e mak ha'u hanoin servisu barak ne'ebé ita sei halo iha tinan ida ne'e nia laran”, dehan nia. (*)