“STAE seidauk halo hotu, ohin loron ikus, e aban entrega hotu ona ba CNE e CNE komesa halo ona nia verifikasaun ba votu nulu, votu reklamadu sira ne'e e espera katak loron rua, loron tolu nia laran rezultadu ita bele anunsia sai”, dehan José Belo, iha Ótel Timor Kolmera, segunda (21/03).
Dadaun ne'e, CNE foin simu rezultadu votu husi munisípiu Aileu no munisípiu sira seluk seidauk, tanba ne’e sei hein munisípiu sira seluk hodi verifika.
“Ita foin mak simu sentru sira ne'e, husi Aileu mak mai ona, liliu kona-ba rezultadu munisípiu ida nian, e sira seluk seidauk tama iha Dili, ohin kala sira tama hotu ona e espera aban ita komesa ona sura verifika fali”, katak nia.
Ba prosesu eleisaun ne’ebé la’o, CNE seidauk haree infrasaun ka problema balun, maibé kestaun tékniku liliu ema la partisipa másimu iha sentru votasaun paralelu ne'ebé CNE prepara.
“To'o agora ita haree ba infrasaun laiha, iha hanesan kestaun tékniku de'it, liliu ema sira ne'ebé paralelu la partisipa másimu tanba informasaun, tanba mós kestaun hatama lista ne'e tarde ida ne'e mak iha, depois iha fatin balun ne'ebé ita-nia ekipa sira dalaruma sentru Votasaun sira tama ho karreta depois iha mós sira-nia konflitu ida ne'e mak ita rejistu, e ita haruka kedas polisía hasai tanba ida ne'e kontra lei”, informa nia. (*)
