Tuir Estudante Finalista husi Universidade Nasionál Timor Lorosa'e (UNTL), Fakuldade Agrikultura, husi Munisípiu Ermera, Julmiro Fernandes hatete, durante ne'e hatama ona deklarasaun maibé nia parte la hatene tanba saida mak nia labele tuir eleisaun.
“Ami sei konfirma, STAE razaun tanba saida mak ami prense tiha formuláriu maibé ami labele vota, deklarasaun sira ne'e ami prense iha eskola iha fakuldade no entrega ba CNE tanba ne'e mak ami konfirma fali no hatudu ami-nia kartaun eleitorál depois sei simu fali informasaun no ami-nia naran ne'e koneksaun ho lista ne'e ka la’e”, dehan nia ba jornalista www.tempotimor.com iha Gedung Matahari Terbit (GMT), Dili, sábadu (19/03).
Iha mós Estudante husi Universidade Nasionál Timor Lorosa'e (UNTL), husi Munisípiu Ermera, Acacio Pereirra, deside la tuir eleisaun Prezidensiál, tanba nia rejista ona maibé naran la sai iha sentru Votasaun Paralelu iha Dili laran.
“Ha'u rejista tiha ona iha Sede Suku Kaikoli nian, sira haruka dehan ha'u-nia iha GMT, ha'u mai tiha GMT sira haruka ha'u atu ba fali Komoro, maibé ha'u sei la ba Komoro mak naran laiha mós gasta tempu loos ha'u lakon ha'u-nia direitu mós laiha buat ida”, deklara nia.
Alende estudante Serjinho Caet husi Oeckussi mós akresenta katak, rejista tarde tanba ida ne'e mak nia sei la eleisaun prezidensiál iha tinan 2022.
“Tanba ami terlambat, ne'ebé mai ba husu sira iha laran dehan labele vota, mais dekralasaun ami hatama tiha ona ne'ebé ami iha ne'e barak atu vota mais deklarasaun laiha ne'ebé ami la jadi vota”, afirma nia.
Nune'e Negosiante, Lucia Sique ne’ebé la konsege ezerse direitu votu, tanba durante ne'e la hetan informasaun no prosesu oinsá trata deklarasaun ba vota iha sentru votasaun paralelu.
“Ami hakarak kontribui ba nasaun ida ne'e soké dalaruma informasaun husi suku sira mak laiha, foin dadauk ami ba husu duni, sira dehan hotu tiha ona, alende ne'e ami mós laiha televizaun atu nonton, situasaun hanesan ne'e mak ita ketinggalan informasaun la'ós ami atu kontribui ba nasaun ida ne'e ami hakarak soké ami falta informasaun”, dehan nia.
Brigada ba Eleisaun Prezidensiál iha sentru Votasaun Paralelu Sentrál, Elias de Deus hatete, iha problema barak mak la konsege rejista no laiha naran.
“Ha'u hanoin problema mak balun la rejista mós hakarak mak vota, no problema seluk mak balun la rejista mais sira dehan mai rejista, no seluk tan mak balun rejista ho ekipa ami ba rekolla hamutuk tiha mais balun ida rua naran laiha nafatin”, afirma nia.
Problema ne'ebé hasoru to'o estudante rihun-ualu-resin la tuir votasaun iha eleisaun prezidensiál, tanba estudante sira prense hotu tiha formuláriu maibé instituisaun la fasilita deklarasaun, balun fasilita nune'e submete ba kampus sentrál, maibé sira la submete ba Sekretariadu Tékniku Administrasaun Eleitorál (STAE) no ikus mai naran labele tama ba sistema.
Tuir observasaun ne'ebé www.tempotimor.com nota iha terrenu votante barak mak la konsege ezerse nia direitu atu tuir eleisaun prezidensiál tanba laiha deklarasaun. (*)