“Ita labele mendahului, ita labele deklara uluk saida mak desizaun povu nian, laiha kandidatura ida ne'ebé mak nia hatene ona katak nia manán, se nia bele halo buat ruma iha kotuk mak nia bele garante katak nia manán ona, mais ita entrega ba povu entaun povu mak sei hili, ema ida loroloron la'o hamutuk ho ita mós dalaruma la hili ita, ida ne'e mak ita hanaran demokrasia ezerse nia direitu ne'e”, dehan Mariano Assanami ba jornalista sira iha sentru votasaun Bairopite, sábadu (19/03).

Tanba entrega ba povu deside, buat ne'ebé mak Kandidatu sira halo, mak ko'alia saida atu halo bainhira eleitu no hato'o mensajen ba sidadaun hothotu, ba inan aman sira joven milenial sira ne'ebé desizaun saida de'it mak povu nian.

Ba direitu demokrátika ne'e direitu fundamentu povu nian, ne'ebé mak ema barak sosa ho rán no ruin ba rai Timor Lorosa'e, tanba prontu simu rezultadu husi povu.

“Labele deklara buat ida ha'u fiar ba Maromak buat hothotu, no rezultadu saida de'it mak iha ne'e rezultadu povu nia, povu agora ezerse nia direitu Polítiku no demokrátiku, se de'it mak povu fó konfiansa nia mak sai ita-nia prezidente ita hotu nia Prezidente Repúblika, respeitu povu nia lian mak Maromak nia lian, ne'ebé saida mak sira dehan ida ne'e duni e se de'it mak eleitu sira Prezidente Repúblika nia sai prezidente ba povu tomak”, deklara nia.

Tanba atu sai prezidente Repúblika ne'e prezidente úniku atu halakon diskriminasaun, kór partidu maibé nia kna’ar mak garante direitu povu nian hodi moris livre no hakmatek.

“Halakon diskriminasaun labele kór polítika hodi tama iha Prezidente Repúblika mak garante independente nasionál hodi grante ba direitu sidadaun atu moris livre moris ho hakmatek moris ho sidadaun númeru ida iha rai ida ne'e no ema labele sai númeru rua iha rai ida ne'e”, afirma nia. (*)