“Ha'u hatete ona katak fiar metin ba ida ne'e husik povu ninia votu mak sei konfirma, militante ho simpatizante sira ne'e sempre simu hela nafatin rezultadu saida de'it agora ha'u atu apela ba hothotu atubele iha vontade ida ne'e, se mak kompete bele prontu para lakon no manán, mais ha'u dehan katak ha'u sei manán”, dehan Lú Olo ba jornalista sira hafoin ba vota iha sentru votasaun Faról, sábadu (19/03),
Maibé, rezultadu ne’ebé fó husi povu iha loron 19 marsu ne’e sei determina kandidatu ida husi kandidatu na’in-16 atu lidera nasaun Timor-Leste ba tinan lima, tanba ne’e lakon mós sei kontinua servisu hamutuk ho Prezidente Repúblika foun.
“Kampaña hotu ona, agora votu ne'e, sira de'it votu ne'e kuandu hotu ona mak ida ne'e ona, tanba ida de'it mak sai prezidente Repúblika ba sidadaun hotu nia prezidente Repúblika”, afirma nia.
Nune'e iha nia deklarasaun, iha sentru votasaun ne'e mak, atu hametin Estadu direitu demokrátiku, no hadi’a dezenvolvimentu sustentável ba povu nia moris di'ak.
“Ha'u-nia deklarasaun de votu mak ha'u hatete ona iha debate iha kampaña ha'u vota atu hametin ita-nia Estadu de direitu demokrátika hodi hadi’a hodi halo dezenvolvimentu ida ne'ebé sustentável para hodi bele hadi’a ita-nia povu ninia moris di'ak ida ne'e mak ha'u-nia deklarasaun de votu”, deklara nia.
Maibé, hameno nafatin ba fiskál, sira no ekipta tékniku sira iha sentru votasaun sira tenke halo servisu didi’ak hodi nune'e fó rezultadu votasaun ho di'ak ba públiku.
“Mensajen ligadu ba kontajen votu ha'u haree katak ekipa sira iha ne'e sira sei hala'o nia servisu ho di'ak atu nune'e halo apuramentu loloos ba rezultadu sira ne'ebé ohin loron ida ne'e ema hothotu ba husik hela sira nia votu ne'e”, dehan nia. (*)