Login to your account

Username *
Password *
Remember Me

Buletin Votu Kuak, Horta Konsidera Tendénsia Manipulasaun Hahú Mosu

Reprezentante Ekipa Susesu José Ramos Horta, Avelino Coelho. Reprezentante Ekipa Susesu José Ramos Horta, Avelino Coelho. Foto Tempo Timor

Tempotimor (Dili)-Ekipa Susesu Kandidatu Prezidente Repúblika (PR), José Ramos Horta, konsidera buletin votu ne’ebé identifika kuak, hatudu tendénsia manipulasaun hahú mosu antes tama ba loron eleisaun Prezidensiál, sábadu (19/03).

Iha bulletin votu ne'ebé mak ekipa husi Sekretariadu Tékniku Administrasaun Eleitorál (STAE) transporta ba munisípiu 13 inklui Rejiaun Administrativa Espeisál Oekussi Ambeno (RAOEA) balun hahú foer no ku'ak.

“Eleisaun ida agora, eleisaun ne'ebé halo ema barak nakdedar, ema tenta meiu oioin atu manipula eleitór sira, tenta mós dezorienta eleitór ninia votu, e ema tenta kria meiu oioin atubele hamosu frau des eleitorál. Ezemplu ida de'it iha munisípiu balun, e públiku hatene hotu ona iha prova buletin votu balun ne'e kuak tiha ona, e tu'u tiha ona, ne'e hatudu momos ona katak iha ona tendénsia de manipulasaun”, dehan Reprezentante Ekipa Susesu José Ramos Horta, Avelino Coelho, iha Sede Nasionál Kandidatura, Hudi Laran, kinta (17/03).

Ba situasaun ne'e, Ekipa Susesu Kandidatu José Ramos Horta hakarak klarifika, ema balun manipula tanba iha ona evidénsia ne'ebé hatudu ona no liga mós ho intimidasaun terrór ne'ebé mak akontese iha Sede Nasionál Partidu Congresso Nacional de Reconstrução de Timor (CNRT) iha Bairros dos Grilhos, kuarta (16/03).

“Horseik depois de ba kampaña tuda sede CNRT ne'e hotu iha indikativu ne'ebé mak hatudu katak iha ipotis boot tebtebes atu ema balun ne'ebé ladun fiar-an ona, utiliza meiu oioin atu intimida, terór, hatauk eleitór sira atu ba vota. E pior liután para aleinde frau de elitorál bele perturba prosesu tomak durante períodu votasaun no kontajen”, hatete nia.

Tanba ne'e, ekipa ne'ebé reprezenta kandidatura númeru 14, simu pedidu husi kandidatu José Ramos Horta ho Prezidente Partidu CNRT, Kay Rala Xanana Gusmão atubele hato'o preokupasaun ida ne'e ba públiku kona-ba deskonfiansa tendénsia ne'ebé la kualifika demokrásia.

“Tanba ema ne'e toman tiha ona, konstituisaun nia la respeitu mós nia toman tiha ona, kuantu mais lei sira ne'e”, afirma nia.

Ba situasaun ne'e, husu ba orgaun eleitorál, Prezidente Komisaun Nasional ba Eleisaun sira, José Agostinho Belo no Diretór Ezekutivu STAE, Alcino Manuel Branco, atu haree investiga realmente transporta buletin votu sira iha munisípiu balun ne'ebé públiku deteta tiha ona katak balun ko'ak no foer.

Bainhira deteta, mak CNE ho STAE presiza foti medida, liuhusi kooperasaun ho instituisaun Seguransa no Defeza hodi kontrola transporta materiál eleisaun nian ba sentru votasaun.

Parte seluk maka CNE ho STAE tenke fó mós kbi'it di'ak liuba ekipa fiskál sira, ne'ebé mak kandidatu ida-idak monta tiha ona atu kontrola materiál eleitorál iha munisípiu.

“E durante prosesu de votasaun presiza iha kontrolu maka’as, CNE ho STAE presiza iha koordenasaun di'ak ho instituisaun seguransa ho defeza atu la permite grupu organizadu ruma atu hadau eleitoradu, ou atu perturba prosesu votasaun no prosesu de kontajen, atu nune'e manán karik manán ho di'ak, labele hakarak manán mais perturba prosesu tomak”, dehan nia.

Entretantu Deputadu bankada Frente Revolusionáriu Timor-Leste no Independente (FRETILIN), José Agustinho Sequeira ‘Somotxo Matar Mimiraka’ hatete, nia parte la hatene kona-ba buletin kuak barak, maibé iha buletin ida-rua mak ku'ak ne'e presiza buka hatene tanba dala ruma parte tékniku iha imprensaun mak problema.

“Kuandu hanesan ne'e siknifika katak hanesan iha problema tékniku ruma iha imprensaun ka printer”, dehan nia.

Nu’udar reprezentante povu husu nafatin ba STAE no CNE ne'ebé responsável ba produsaun bulentin votu, atu haree dia’k buletin sira ne'e molok distribui ba munisípiu.

“Tenke haree didi’ak, sé iha sinál ruma iha, para labele hanesan fó imajen ida ne'ebé as vezes problema tékniku sai hanesan problema polítiku. Tanba as vezes kondena ne'e la'ós kondena ema seluk, kondena ne'e mak STAE ho CNE ho Ministériu Administrasaun Estatal (MAE), ne'ebé apela nafatin para reve nafatin buletin sira ne'e keta hanesan iha sinál ruma”, esplika nia. (*)

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« February 2023 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28          

Tempo Timor Networks

Online Counter