“Los duni, iha sidadaun na’in-rua ne'ebé mak ita nian patrolla foti no detein hela e agora dadauk prosesu iha eskuadra na’in feto ninian, sei kontinua la'o”, dehan Henrique iha Kuartel Jerál PNTL, Kaikoli, Dili, kinta (17/03).

Ba sidadaun na’in-rua ne’e, hafoin prosesu sei komunika ho parte prokuradór nian, nune'e hodi haree ninian kontinuasaun.

“Ema na’in-rua ho motorizada rua, evidénsia ne'e mós agora dadauk iha eskuadra Don Aleixo, para nune'e hodi kontinua prosesu”, afirma nia.

Enkuantu husu kona-ba inisiál husi sidadaun na’in-rua refere, no motivu husi ataka sede partidu CNRT nia ne'e, Komandante dehan, dadaun ne'e nia seidauk hetan naran inisiál inklui motivu husi ataka malu ne'e tanba sei iha prosesu investigasaun nia laran.

Ba akontesimentu ne’e, Militante Partidu Frente Revolusionáriu Timor-Leste no Independete (FRETILIN) ne’ebé fó apoiu ba Kandidatu Prezidente Repúblika, Francisco Guterres ‘Lú Olo’, ‘tenta’ ataka sede Nasionál Partidu CNRT iha Barros dos Grilhos, kuarta (16/03), maibé militante CNRT rasik mós foti fatuk hodi tuda militante FRETILIN.

Ho atetude ne’ebé hatudu husi apoiante Kandidatu Lú Olo ne’ebé lori ho Bandeira FRETILI, mak militante no Estutura hamutuk ho seguransa iha Sede CNRT hadau motorizada rua ne'ebé deskonfia hala'o provokasaun iha Sede Nasional Partidu CNRT.

Motorizada rua ne'ebé mak CNRT sita ne'e, kesi hela bandeira FRETILIN iha oin hodi hala'o kombiu iha ámbitu kampaña Kanidatu Lú Olo ne'ebé mak hala'o iha Tasitolu, loron kuarta (16/03).

Tuir fonte husi partidu CNRT nian ne'ebé lakohi fó sai nia indetidade ba www.tempotimor.com, esplika,  motorizada rua ne'e parte CNRT sita tanba sira mai ho assaun komboiu no halo provokasaun inklui tuda kanek mós militante na'in-ida husi partidu CNRT iha sede Nasionál.

“La'e sira mai provoka iha sede, mai provoka iha sede ne'e mak ami tahan motorizada rua, sira tuda alin ida kanek tán, agora ami iha Sede Nasionál hela”, hatete nia liuhusi wahatsapp, kuarta (16/03).

Maibé iha vídeo ne’ebé ekipa www.tempotimor.com asesu hatudu, militante partidu CNRT rasik mós tuda hela militante FRETILIN na’in-3 ho motirizada ne’ebé fila iha Sede CNRT nia oin. (*)