Login to your account

Username *
Password *
Remember Me

Kampaña Ikus Lú Olo iha Dili, Alkatiri ‘Bolu’ Horta At Liu Ai Kekeu

Sekretáriu Jerál Partidu Frente Revulusiónariu Timor-Leste no Independente (FRETILIN), Marí Bin Amude Alkatiri, hamutuk ho Jose Ramos Horta, iha momentu balun liuba. Sekretáriu Jerál Partidu Frente Revulusiónariu Timor-Leste no Independente (FRETILIN), Marí Bin Amude Alkatiri, hamutuk ho Jose Ramos Horta, iha momentu balun liuba. Foto Suplay

Tempotimor (Dili)-Sekretáriu Jerál Partidu Frente Revulusiónariu Timor-Leste no Independente (FRETILIN), Marí Bin Amude Alkatiri, ‘bolu’ Kandidatu Prezidente Repúblika, José Ramos Horta, at liu fali ai kakeu, tanba halai ba mai hodi atinje objetivu pesoál.

“Horta ne'e at liu Ai-Kakeu, nia la presiza anin huu husi tasi ka, huu husi foho, anin la huu mós nia kedok ba kedok mai de'it, ne'e mak Horta.

Tanba Horta tempu tomak halo servisu nia objetivu ida, ne'e ajenda primeiru propriu, ninia ajenda uluk nia mehi atu sai sekretáriu Jerál Nasaun Unidas, la hetan, hakarak sai fali Komisáriu direitu umanu la hetan

“Agora servisu laiha, ba tabele ba Xanana, nia dada Xanana nia saku, Xanana ho nia ai-tonka”,

Maibé Alkatiri dehan, nia ko'alia dala barak ona, katak hanesan fundadór hamutuk ho Prezidente Partidu FRETILIN, Francisco Guterres ‘Lú Olo’, iha 2006-2007, deside kedas estratejia foun, segunda luta da libertasaun nasionál atu liberta povu husi mukit no husi kiak, atu lori justisa ba rai ida ne'e, atu kombate korrupsaun.

“Ami na'in-2 define no tetu di'ak FRETILIN ne'e mak ami dehan atu hametin no haburas aliansa ho povu, agora ita bele haree, aliansa ho povu metin, metin tuir área politika FRETILIN nian e metin bainhira partidu sira seluk kumpriende katak, balun ba kore povu husi kiak no mukit, hasai povu husi nakukun ba tenke hamutuk ho FRETILIN. Ne'e ita haree momos, haree momos katak iha resposta ida ne'e”, afirma Alkatiri.

Diretór Kampaña Kandidatu Lú Oli, José Manuel ‘Nakfilak’, deklara iha enseramentu komisiu kampaña Kandidatu Lú Olo iha Tasitolu katak númeru 6 Prezidente Repúblika ona antes eleisaun, tanba hetan apoiante mai husi Grupu no organizasaun massa oioin.

“Ohin ita iha ne'e manu fuik nia lian ita la rona, ema mak rona ita-nia lian, hatudu saida, númeru 6 Prezidente Repúblika tiha ona, hahú husi Oekussi mai to'o rai klaran, ba to'o rai ulun, fila mai iha Dili hatudu momos povu nia domin ba Prezidente Lú Olo ne'e oinsa?. Tanba nia la kakeu, nia hambrik metin iha nia fatin, la hanesan kandidatu númeru 14 kakeu ba kakeu mai, tinan lima-lima nia hatais kamizola troka ba troka mai atubele buka de'it hala'o nia ambisaun pesoál”, dehan nia iha Tasitolu, kuarta (16/03).

Enkuantu, Kandidatu Prezidente Repúblika, Francisco Guterres ‘Lú Olo’ mós husu ba povu, iha loron 19 fulan-marsu vota ba nia, vota ba númeru 6.

“Vota ba númeru 6, atu halo saida?. Primeiru atu hametin Paz ho estabilidade iha ita-nia rain, segundu ha'u sei kumpri de'it ha'u-nia kna’ar tuir konstituisaun RDTL ninian, terseiru ha'u sei respeitu nafatin prinsípiu separasaun de poder nian katak, Prezidente Repúblika organ ketak, Governu organ ketak, Parlamentu ketak, maibé sei loke odamatn ba malu atubele iha interdependénsia entre oragan sira hotu atu hala'o sira-nia kna’ar lori dezenvolvimentu ba oin”, deklara Lú Olo.

Iha ne’e Prezidente Repúblika, Lú Olo sei hamutuk nafatin ho organ sira seluk, organ Governu nian, atubele hala'o nafatin atu hadi’a povu nia moris liuhusi ekonomia ida sustentável.

“Ita-nia fundu minerai, osan ne'ebé uluk sira mai temi ba imi, ita-nia osan sei iha maibé tenke uza osan ne'e ho didi'ak atubele hadi’a povu nia moris, la'ós lori osan ne'eba benefisiu de'it ema oituan maibé povu ne'e kiak nafatin”, dehan nia. (*)

Rate this item
(0 votes)
Last modified on Wednesday, 16 March 2022 23:59
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« February 2023 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28          

Tempo Timor Networks

Online Counter