“Ha’u agradese ba imi hotu ne’ebé fó ona imi-nia kartaun eleitórál hodi bele apoiu mai ha’u-nia kandidatura ida ne’e”, dehan nia iha kampaña ba ikus, munisípiu Dili, kuarta (16/03).

Aleinde agradese mós ba Koselleiru Supremu Partidu KHUNTO, José dos Santos ‘Naimori Bucar’ no estrutura, inklui ekipa susesu sira iha baze to’o nasionál ne’ebé fó suporta másimu ba ninia kandidatura.

Ba apoiu hirak ne'e, Armanda Berta dos Santos, promete sei hala’o nia kna’ar tuir de'it kompeténsia nu’[udar Prezidente Repúblika, liliu hametin relasaun di'ak ho nasaun hothotu liliu nasaun vijiñu sira ne'ebé durante ne'e fó apoiu ba Timor-Leste.

“Sé ha’u eleitu nu’udár PR, mak ha’u sei halo relasaun di’ak ho nasaun viziñu sira no mós nasaun sira hothotu, hodi bele haree ba ita-nia nasaun ne’ebé durante ne’e, ita-nia nasaun parseiru sira ajuda mai Timor-Leste”, afirma nia.

Ho ida ne'e, Kandidatura Armanda Berta husu atu ema hotu unidade hodi hametin páz no estabilidade, atu nune'e bele hala’o dezenvolvimentu ida ne'ebé dignu ba povu, tanba laiha páz dezenvolvimentu mós sei la la’o. (*)