Durante aprezentasaun, Kandidatu Rogeiro Tiago Lobato hatete, vizaun ne'ebé mak sei tau prioridade iha nia mandatu mak tau Timor-Leste hanesan nasaun demokrátiku livre ba sidadaun.
“Ha’u-nia vizaun mak ne'e, ha’u hakarak Timor-Leste ida livre e demokrátiku, tanba iha pais barak iha mundu independente maibé la'ós livre e demokrátiku”, dehan nia bainhira partisipa debate kandidatura Prezidente Repúblika iha Ótel Novu Turizmu, Lesidere, tersa (15/03).
Nu’udar Prezidente Repúblika, sei defende Timor-Leste ida ho dezenvolvidu nomós Timor-Leste ida ne’ebé justu, no hakarak Estadu ida forte iha Timor-Leste, no rekonsiliadu ho verdade.
Bainhira ko'alia kona-ba rekonsiliasaun ida ne'e la'ós de'it rekonsiliasaun ba polítiku, maibé rekonsiliasaun ida dok husi situasaun.
Aleinde iha misaun, bainhira sai Prezidente Repúblika, sei halo buat hotu atu garante verdade ho unidade nasionál, sei sai Prezidente ida independente iha nia desizaun sira, konsiliadór atu rezolve diferensa entre Timoroan sira.
Nune'e mós sai Prezidente ida ponte intendimentu entre forsa politika ka politika partidaria hothotu, nomós Prezidente ida ne’ebé defende konstituisaun husi meza e garante estabilidade politika no governativa, atu nune'e halo dezenvolvimentu sosiu ekonomiku ida lalais no efikasia. (*)