“Insidente ne'e horisehik ami-nia ekipa, tuku 2:00 desloka ba komisiu polítika iha Komoro ne'ebé halo husi kandidatu númeru 6, Francisco Guterres ‘Lú Olo’, haree militante sira lori nia oan ba fatin kampaña nian, labarik lubuk ida mak nia hasai fotografia, depois militante ne'e hakilar tanba sa, mak mai hasai de'it ami-nia fotografia no la ba hasai sira seluk nian, mak nia tuku iha parte ulun”, dehan Diretora Institutu Direto Defeza Criança, Dinorah Granadeiro, iha nia kna’ar fatin Kaikoli, tersa (15/03).
Maske iha momentu ne'e halo esplikasaun ba papél INDDICA nian, hodi hasai fotografia la defende ba kandidatu A ka B maibé kampaña hotu halo observasaun ba kandidatu sira ne'ebé kompete iha eleisaun prezidensiál tinan 2022 ne'e.
“Iha momentu ne'e militante FRETILIN barak mak haraik ami-nia kolega ne'e, nia komesa dada-an atu la'o ba palku atu salva nian-an, maibé militante mai ho emosaun no nervozu ko'alia liafuan oioin mak nia kontinua la'o entaun sira tuku nian, kolega ne'e rasik la haree militante ne'e mak tuku husi nia kotuk parte ulun nian”, esplika nia.
Insidente ne'e mosu iha kampaña kandidatu númeru 6 nian, maibé husi parte seguransa partidu polítika FRETILIN nian halo kedas atuasaun hodi salva observadór ne’e no lori kedas ba fatin seguru.
“Iha momentu ne'e ami-nia kolega ne'e kontaktu kedas mai ami kona-ba insidente ne'e, maibé ami mós informa kedas ba komandu Polísia Nasionál Timor-Leste (PNTL) hodi haree ba situasaun ne'e, ha'u rasik halo komunika kedas ho ekipa team susesu husi partidu nee rasik, maibé sira informa mai ha'u kolega ne'e sira asegura ona”, haktuir nia.
Ba observasaun ne’ebé INDDICA halo ba kandidatu sira hotu kedas ho maneira hanesan hasai fotografia no halo espliksaun ba família sira, kona-ba labele lori labarik sira partisipa kampaña tanba iha ne'ebá militante barak.
Tanba ne’e, husu lideransa partidu polítika sira hotu liliu ba partidu FRETILIN atu eduka ninia molitante sira hotu hodi respeita entidade sira seluk ne'ebé halo servisu nakait ho kampaña eleitorál.
Nune’e, ekipa susesu partidu polítika nian hodi mantein orden iha kampaña eletorál no respeitu ekipa onservadór nasionál no internasionál sira, INDDICA mós kondena aktu violénsia refere no sei hato'o ba CNE ho STAE. (*)
