Hafoin simu afiliasaun, Sekretáriu Jerál Partidu FRETILIN, Marí Bin Amude Alkatiri hato'o bemvindu ba militante Partidu CNRT uma-ka’in 20 ho nia ema hamutuk 130 ne'ebé filafali hodi fó apoiu ba kandidatu Prezidente Repúbika, Francisco Guterres ‘Lú Olo’.

“Kandidatu Prezedente husi povu ba povu tomak Francisco Guterres ‘Lú Olo’, ohin ita hotu mai iha ne’e para konfirma tan dala ida prosesu tomak atu halo aliansa ho povu komesa iha rezultadu, ha'u fó bemvindu ba kamarada sira ne'ebé mak tama fali mai FRETILIN, ita mai atu konfirma kandidatu Prezedente Repúblilka Lú Olo nia vitória, no ita prepara-an ba eleisaun 19 marsu, ha'u hanesan Sekretáriu Jerál hamutuk ho aliadu (Os Verdes, PUDD, PLP no Kolimau 2000) sira konvida kamarada sira atu halo Tasitolu Mean no Verdes”, hatete Mari Alkatiri iha Bekora, segunda (14/03).

Tanba ne’e, husu ba militante hotu atu lori tan ema ida ka rua ba vota ba númeru 6, kandidatu Prezedente Repúblilka Francisco Guterres ‘Lú Olo’.

Kandidatu Prezedente Repúblilka, Francisco Guterres ‘Lú Olo’ deklara nia parte prontu sai Xefe Estadu, tanba ne’e agradese ba apoiu ne’ebé fó husi aprte sira hotu.

“Ha'u prontu ona mai hamrik ona iha imi-nia oin, hodi sai kandidatu Prezidente Repúblika 2022 to’o 2027. Ha'u fó obrigadu mós ba partidu FRETILIN, partidu Os Verdes de Timor, PUDD, PLP no Kolimau 2000 ne’ebé apoiu ha'u atu sai Prezidente Repúblika”, afirma Lú Olo.

Tanba ne'e atuál sei kontinua ho kompromisu katak sei kumpri de’it ba konstituisaun no kna’ar orgaun soberania sira hotu.

Nune’e, husu ba militante no apointe sira atu labele fiar fali boatu husi parte sorin ne’ebé dehan Lú Olo viola konstituisaun Repúblika. (*)