Print this page

Simu Ezonesaun, Oan Soru 'Kritika' PM Taur 'Kakutak Fraku'

Vise Prezidente Partidu Congresso Nacional de Reconstrução de Timor (CNRT), Gil da Costa Monteiro ‘Oan Soru’. Vise Prezidente Partidu Congresso Nacional de Reconstrução de Timor (CNRT), Gil da Costa Monteiro ‘Oan Soru’. Foto Suplay

Tempotimor (Likisá)-Vise Prezidente Partidu Congresso Nacional de Reconstrução de Timor (CNRT), Gil da Costa Monteiro ‘Oan Soru’ hatete, nia parte simu ezonerasaun husi Governu daualu, maibé kritika Primeiru Ministru (PM), Taur Matan Ruak, kakutak fraku, tanba la halo tuir konferénsia datolu husi Aliansa Mudansa Progressu (AMP).

Maibé, Gil Oan Soru agradese ba desizaun hodi ezonera nia husi kargu Sekretáriu Estadu Asuntu Antigus Kombatentes Libertasaun Nasionál (SEAAKLN) iha Governu daualu.

“Primeiru hakarak agradese ba Xefe Governu ne'ebé laran luak hodi ezonera ha’u, agradese ba ida ne'e”, delara nia iha komisiu kampaña eleitorál kandidatu José Ramos Horta iha Munisípiu Likisá, segunda (14/03).

Iha ne’e, agradese mós ba Prezidente Partidu CNRT, Kay Rala Xanana Gusmão, ne'ebé mak uluk lori Gil Oan Soru envolve membru Governu, hodi prepara-an ajuda mós polítika iha governasaun daualu.

Tanba, iha momentu ne'eba, partidu CNRT haruka karta ona atu rezigna-an husi Governu, maibé Oan Soru deside mantein tanba hakarak aprende politika Governu nian.

“Ita-boot sira rona didi’ak, programa oitavu Governu ida ne'e aprova iha Parlamentu Nasionál, nein 1 cent de'it mós oitavu Governu la halo, tanba saida mak CNRT deside vota abstein iha Parlamentu Nasionál tanba konferénsia dala-tolu Aliansa Mudansa ba Progressu (AMP) ninian Primeiru Ministru la halo tuir, siknifika ninia kakutak fraku”, esplika nia.

Tanba ne'e, kompriende saida mak naran irarkia, ema dehan tenke loial ba superior, maibé prefere loial ba povu duke loial ba superior sira ne'ebé la halo buat ida.

Ho ida ne'e, husu militante no simpatizante CNRT atu hamutuk lori Ramos Horta ba sai Prezidente Repúblika hadi’a buat hirak ne'e, liliu hamoos rai rahun iha mundu nia matan, ne'ebé agora dadauk hateke Timor-Leste la hetan tiha ona.

Tanba iha tempu funu, kuandu povu Timor-Leste hetan violasaun diretu umanu, nasaun seluk mai fó solidariedade no kuitadu ba terus ida ne'ebé povu enfrenta.

Maibé Governu ida ne'e haree ba situasaun Mianmar, wainhira ema oho inan feton sira, rakut ropa nakles, enkuantu Timor-Leste ba vota kontra ne'e hatudu laiha kapasidade.

“Depois ba ita-nia ukun ne'e fó parabéns ba ita Ministra Negósiu Estranjeiru no Kooperasaun, sira ne'ebé aitonka ne'e, tonka ha'u hotu, mais sira lakohi baruk ona tonka be sira haruka ha’u sai tiha”, hatete nia.

Durante mandatu, haree Governu ida ne'e gava-an halo buat hotu maibé realidade la halo buat ida.

“Ohin fiu metru ida mós ami seidauk dada ba povu ida ne'e, estrada metru ida mós ami seidauk halo ba povu ida ne'e”, hatete nia.

Maske Governu ba fahe sesta bázika no fahe $200, maibé osan $200 dolar ema sira simu osan boot mós hetan hotu ida ne'e mak Governu gava-an dehan maka’as.

“Inan sira isin-rua atu partu, tama dehan sira fila, oan hotu inan hotu mate, ida ne'e mak dehan uluk imi fakar ra’an ba ukun-an, filafali ho imi hikis kosar ba moris di'ak, imi hikis kosar ami tau bolsu, la halo buat ida, ami oitavu Governu mesak moe laiha inklui ha'u, la halo buat ida mós gava-an la halimar”, hatete nia.

Tanba tuir despaxu ne’ebé www.tempotimor.com asesu katak, Primeiru Ministru, Taur Matan Ruak, hasai atuál vise Prezidente Partidu Kongresu Nasional Rekonstrusaun Timor (CNRT), tanba la loial ba konfiansa ne’ebé Governu daualu oferese.

Nune’e iha despaxu Pirmeiru Minsitru nian ho númeru 0356/PM/III/2022 iha loron 11 Marsu, hato’o agradesimentu ba Sekretáriu Estadu Asuntu Antigus Kombatentes Libertasaun Nasionál (SEAAKLN) Oan Soru ne’ebé durante ne’e depozita ona servisu ba Estadu no dezempeña funsaun hanesan governante ida.

“Iha semana hira ba kotuk ha’u hatene ona notísia kona-ba deklarasoens públika sua eselénsia ne’ebé ho substansialmente muda realidade, hodi minimiza kapasidade Governu ba enfrenta difikuldade ne’ebé populasaun no nasaun ne’e sente no deklarasaun públika ne’ebé koloka ne’e kauza ba solidariedade no leadade instituisionál ne’ebé hakesi membru Governu hotu, iha atetude umildade no komitmentu demokrátika, buka solusaun konstrutivu hodi ultrapasa dezafiu ba dezenvolvimentu ne’ebé hakdasak hela iha oin, iha momentu importante ne’ebé enfrenta hela impaktu ekonómiku no sosiál tanba Pandemia COVID-19 no dezastre naturál ne’ebé agravadu tebes”, dehan PM Taur iha nia despaxu ne’ebé www.tempotimor.com asesu, segunda (14/03).

PM mós agradese ba Sekretáriu Estadu Gil da Costa ‘Oan Soru’, tanba durante ne’e hola parte ona iha Governu hodi dezenvolve programa Governu nian ne’ebé ligadu ho Asuntu Antigus Kombatentes Libertasaun Nasionál.

“Liuhusi rekoñese no agradese ba ita-boot nia kontribuisaun no dezenvolvimentu programa Governu ba Asuntu Antigus Kombatentes Libertasaun Nasionál, ha’u la tarde mós hodi manifesta ha’u-nia laran susar no tristeza ba ita-boot nia opsaun ne’ebé dadaun hili ona, hodi viola konfinasa ne’ebé fó ba ita-boot, no kauza mós ba responsabilidade hanesan membru VIII Governu konstituisionál”, salienta nia.

Haree ba áktu ne’ebé governante ne’e komete hodi hamonu dignidade no kapasidade Governu, mak Primeiru Minsitru deside hodi demite membru refere husi Governu daualu.

“Hanoin ba kestaun ne’ebé iha leten no halo reflexaun kle’an, ha’u halo konkluzaun katak, S.E. laiha indikasaun ka kondisaun atu kontinua iha funsaun Sekretáriu Estadu ba Asuntu Antigus Kombatentes Libertasaun Nasionál, tanba ne’e ha’u sei haruka ba Sua Eselensia Prezidente Repúblika atu ezonera ita-boot”, haktenik PM.

Primeiru Ministru Taur mós aproveita oportunidade refere hodi espresa votu susesu ba desizaun ne’ebé membru Governu ne’e hili ona.

“Aproveira oportunidade ne’e espresa ha’u-nia agradesimentu ba servisu ne’ebé halo ona no hato’o ha’u-nia votus susesu ba etapa foun iha moris privadu no profesionál ne’ebé eselénsia hili ona”, deklara Taur. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items