“Hanesan ohin ita-nia jerasaun foun hatete, Mana Berta, E Liberta, feto ida naran úniku ita kandidatu la sala, Berta, Liberta, hakarak ka lakohi feto ne'e sempre hadomi ba povu no rai ida ne'e”, hatete nia iha kampaña kandidata Prezidente Repúblika (PR), Armanda Berta iha munisípiu Likisá, sesta (11/03).
Tanba ne’e, povu tomak haree ho matan saida mak Kandidatu Armanda Berta halo ona no saida mak seidauk halo iha Timor-Leste durante ne’e.
Maske buat ne'ebé nia halo ne'e ki’ik maibé konta nafatin liuhusi hari’i unidade ida husi fuan ba fuan mak juventude loriku as'uain ida ne'e hatudu.
“Ita hothotu hatene katak politika ne'e la hanesan, polititka ne'e instrumentu, laiha ida lakon, ita hothotu manán. Manán hodi halo saida?, manán hodi kria estabilidade, manán atu orienta ita-nia povu, no joven atu prepara-an haree ba sira-nia futuru, labele sira sai ai kalsu, labele sira sai ponte”, hatete nia.
Haree ba moto Partidu KHUNTO ne’ebé hatudu hakarak defende ba povu, hakarak hamrik iha justisa nia oin, tanba ne’e hamrik metin hodi hasoru dezafiu sira ne’ebé mosu.
“Ami KHUNTO nafatin hamri’ik iha moru laran, no uma laran, siknifika katak ami sei asegura ho buat ne'ebé mak tau iha ami-nia fuan. Ida ne'ebé mai ho forsa, nia bele mai ho osan, nia bele mai kanta oioin hamrik iha rai nia leten, loron ida anin boot no loron manas boot nia sei halai, mais KHUNTO la halai tanba hamrik iha uma laran”, dehan nia
Tanba ne'e, husu ba joven Likisá tenke maduro, joven Likisá tenke hanoin katak, laiha mundu ida, laiha mane ida mak di'ak liu feto, só feto mak hadomi rai no hadomi povu. (*)