Print this page

STAE Hahú Distribui Buletin Votu ba Munisípiu Sira

Diretor Jerál STAE, Acilino Branco entrega hela buletin votu ba reprezentante husi munisípiu Diretor Jerál STAE, Acilino Branco entrega hela buletin votu ba reprezentante husi munisípiu Foto Tempo Timor

Tempotimor (Díli)-Direitór Jerál Sekretáriadu Tékniku Administrasaun Eleitorál (STAE), Acilino Branco hatete, sira hahú halo ona distribuisaun Buletin votu ba Munisípiu 12 inklui Rejiaun Administrativu Espesiál Oekussi Ambeno (RAEOA) nomós diáspora.

“Ohin ita halo Serimónia distribuisaun ida ne'e ba Munisípiu sira inklui mós Oekussi ohin, tanba Ró disponibiliza ona e segunda (14/03) mós lori mós ba rai li'ur, e ita ohin simbolikamente entrega maibé ba diaspora sei halo transportasaun iha loron segunda”, dehan nia iha Edifísiu STAE Kaikoli, sesta (11/03).

Ba sentru votasaun iha diaspora hanesan iha nasaun haat ne’ebé define Portugál, Austrália, United Kingdom's no Korea Súl.

Nune’e Buletin Votu sei iha Munisípiu durante semana ida hafoin halo tan serimónia distribuisaun ba Postu no Suku sira.

Buletin votus ne’ebé hahú halo distribuisaun imprime husi Imprensa Nasionál Timor Leste (INTL) ne'ebé Governu fó fiar ba sira.

Diretór Imprensa Nasionál Timor Leste, Jaime Correia hatete, nia parte agradese ba Governu Timor-Leste tanba fó ona konfiansa hodi imprime buletin votu ba eleisaun Prezidensiál tinan 2022.

“Iha oportunidade ida ne'e ha'u hakarak hato'o obrigadu barak ba señór Ministru, Diretór Jerál STAE, tanba fó fiar ba Imprensa Nasionál Timor-Leste, tanba ami hanesan instituisaun Estadu ida”, dehan Jaime.

Ba Buletin Votu ne'ebé mak INTL imprime ba eleisaun prezidensiál tinan 2022 hamutuk ho livru 19.462, no kadernu ba buletin votu hamutuk 963.600. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items