“Iha ne'e suku rua mak la mai, tanba ho kondidasaun estrada kotu, e horisehik udan boot entaun ita-nia militante, apoiante sira labele mai marka prezensa iha fatin ida ne'e”, dehan nia iha kampaña loron dasanolu iha Postu Administrativu Atabae, Munisípiu Bobonaro, kinta (10/03).

Tanba ne'e, husu deskulpa ba Prezidente Partidu CNRT, Kay Rala Xanana Gusmão no Kandidatu Prezidente Repúblika, José Ramos Horta tanba la konsege lori militante suku rua mai partisipa kampaña ida ne'e.

Mesmu la marka prezensa iha komísiu kampaña ida ne'e, maibé fiar katak kompromisu politika ne'ebé Kandidatu ko’alia iha kampaña, militante sira sei hatutan ba malu.

Nune’e, husu ba militante sira atu vota ba Kandidatu José Ramos Horta tanba kampaña ne'ebé hala'o iha Atabae ne'e hanesan espesial ida ne'ebé hetan partisipa direta husi Xanana no Horta.

“Ne'e mak Atabae votus tún, maun boot na’in-rua la mai tán iha Atabae, tanba Bobonaro ne'e kampaña iba fatin rua, ida mak Atabae no ida seluk mak Maliana e Atabae ne'e espesiál”, dehan nia. (*)