Print this page

Remodela Membru Governu, Oan Soru Konfesa Sentimentu Moe no Hirus ba Povu

Vise Prezidente Partidu Congresso Nacionál de Reconstrução de Timor (CNRT), Gil da Costa Monteiro ‘Oan Soru’. Vise Prezidente Partidu Congresso Nacionál de Reconstrução de Timor (CNRT), Gil da Costa Monteiro ‘Oan Soru’. Foto Suplay

Tempotimor (Dili)-Vise Prezidente Partidu Congresso Nacionál de Reconstrução de Timor (CNRT), Gil da Costa Monteiro ‘Oan Soru’, hanesan mós Membru Governu daualu ne'ebé deskonfia tama mós lista remodelasaun, aproveita kampaña eleitorál kandidatu, José Ramos Horta, konfesa sentiment moe no hirus ba komunidade sira iha Munisípiu Ainaro.

“Aproveita iha rai Ainaro, husu deskulpa ba inan aman sira, ha'u membru Governu, ha'u prontu sai aban (10/03), mais tanba de'it saida, durante ami-nia ukun besik hotu ona, fiu metru ida ami la dada ba imi-nia uma, estrada 1 kilometru mós ami la ke'e hatutan, tanba ne'e hanesan imi-nia oan sente moe”, dehan Sekretáriu Estadu Asuntu Kombatente Libertasaun no Veteranu, Gil da Costa ‘Oan Soru’, iha kampaña Kandidatu Jos’e Ramos Horta iha Munisípiu Ainaro, kuarta (09/03).

Tanba ne'e husu ba povu Ainaro oan atu vota kandidatu Jose Manuel Ramos Horta ba Prezidente Repúblika, no iha 2023 prepara-an vota ba Kay Rala Xanana Gusmão liuhusi partidu CNRT atu forma Govenu dasia.

“Ema barak dehan ukun tinan 10 la halo buat ida, bosok ten, estrada husi ne'ebá mai to'o Ainaro ne'e, aspal goren ne'e Xanana nia obra, la’ós sira ko'alia ne'e ninian, bosok ten”, afirma nia.

Hanesan membru Governu daualu Oan Soru mós rekoiñese buat barak mak Governu daualu seidauk halo atu responde ba nesesidade povu nian maske mandatu besik atu remata.

Iha loron tersa (08/03), Primeiru Ministru (PM), Taur Matan Ruak, deside sei hasai membru Governu balun hodi hili membru Governu foun atubele aselera programa Governu iha tinan 2022 to’o 2023.

“Sei iha remodelasaun, mais ha'u hanoin iha tiha ba, mak ita-boot sira haree ami sei hatete ba ita-boot sira, ne'e la'ós daun ne'ebé ami subar ba ita-boot sira ami subar ba imi kuandu iha ne'e imi sei hatete remodelasaun ne'e sé, se mak sai se mak tama iha área ida ne'ebé iha Ministériu ida ne'ebé inklui sei hatene”, hatete PM Taur iha Ministériu Finansas Aitarak laran, tersa (08/03).

Kona-ba lista ema nain hira mak sei hasai ne'e PM Taur seidauk ko'alia maibé identifikadu ona katak sei Remodela Membru Governu balun.

“Lista ha'u la simu tanba desizaun ne'e ha'u mak sei deside, tanba ne'e to'o tempu ita-boot sira haree”, esplika nia.

Kona-ba razaun Remodela ne'e PM Taur seidauk esplika iha tempu badak, no sei deklara sai ba públiku, tanba remodelasaun ne’e Governu sei la subar.

“Ba ha'u hanoin to'o tempu ha'u sei esplika ba ita-boot sira tanba saida mak Remodelasaun ne'e ábitu normál remodelasuan ne'e Governu ida sempre halo iha tempu ba tempu halo se ita-boot sira haree, mezmu hein fila ida de'it atu nia mandatu hotu mós bele halo”, dehan nia.

Tuir informasaun ne’ebé fó sai husi fonte envolve iha Partidu Koligasaun ba Governu daulau katak, remodelasaun ne’e akontese, tanba haree ba servisu Ministeriu balu ne’ebé ladún efetivu.

Ba membru Governu sira ne’ebé mak sei Remodela Fonte ne’e konfesa katak, iha Ministru, Sekretáriu Estadu no Vise Ministru husi Partidu Libertasaun Popular ne’ebé sei akontese uluk, hafoin bele haree fali membru Governu husi Partidu FRETILIN no KHUNTO.  (*)

Rate this item
(1 Vote)
Last modified on Friday, 11 March 2022 22:14
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items