“Ha’u husu kadidatu sira tenke uza liafuan sira ne’ebé bele konvense eleitór sira, duke utiliza liafuan sira ne’ebé ataka ema seluk nia personalidade hodi provoka situasaun. Ha’u hanoin ida ne’e la di’ak, tanba kandidatu na’in-16 mesak sidadaun timoroan”, dehan prezidente CNE, José, iha edifisiu CNE, Kolmera, tersa (08/03).
Durante kampaña eleitorál kandidatu sira iha baze hasoru apoiante no simpatizante tenke respeita nafatin paktu eleisaun pasifiku, hodi ko’alia programa, bainhira eleitu sai Prezidnete Repúblika atubele implementa iha tinan lima nia laran.
Haree ba kampaña iha kandidatu balun ko'alia duni kona programa ne’ebé mak iha no la introduz liafuan sira ne’ebé ho karater provoka kandidatu sira seluk, maibé iha ekipa kampaña balu mak halo deklarasaun iha palku la ho liafuan sira ne’ebé kalma maibé ho liafuan sira tendénsia provokativu.
“Tanba ne’e husu ba kandidatu no ekipa kampaña sira ne’ebé mak iha atu respeita regra ne’ebé mak iha, tanba eleisaun ne’e la’ós ita mesak mak haree, maibé sosiedade internasionál liliu Nasaun Unidas, Uniaun Europeia, ne’ebé ita tenke hatudu imajen ne’ebé di’ak hanesan nasaun demokrátiku ida disiplina”, dehan nia.
Ho ida ne’e, CNE haruka ona karta ba kandidatu hotu hodi tau atensaun ba prosesu sira ne’e, tanba kampaña eleitorál foin la’o loron hirak de’it hahú ataka, nune’e evita liafuan sira ne’ebé mak kandidatu sira uza tenke tetu didi’ak.
“Liliu ekipa susesu sira tenke orienta ona apoiante sira tenke respeita ema seluk, se la’e bele estraga ita-nia imajen”, hakotu nia. (*)