“Ohin PM bolu ha’u, Komandante Jerál ho Segundu Komandante Jerál hodi mai atualiza situasaun atual rai laran nian durante kampaña prezidensiál durante loron rua nian no ohin ita mai aprezenta ba PM na kualidade hanesan Ministeriu Interior”, dehan Antonio Armindo, hafoin remata enkontru ne’e iha rezidensia ofisial Primeiru Ministru, Farol, sesta (04/03).
Iha aprezenta situasaun ne'e hamutuk ho Komandante Jerál PNTL, Komisáriu Polísia Faustino da Costa no Segundu Komandante Jerál PNTL, Komisáriu Mateus Fernandes.
Ba situasaun jerál ba loron rua nian la’o di’ak no hetan seguransa husi PNTL no Komandu PNTL simu relatóriu kada loron husi Komandu Munisípiu sira no relatóriu ne’e mós haruka ba Ministru Interior.
“Hahú loron dahuluk ba kampaña jeralmente buat hotu la’o normál, iha de’it insidente ki’ik ida envolve sidadaun ida ne’ebé mak halo azneiras iha primeira kampaña iha Ainaro depois seguransa sira halo atuasaun lori ba komandu identifika katak sidadaun ne’e difisiensia mentál”, nia afirma.
Bainhira husu kona-ba envolvimentu minoridade durante kampaña, Antonio Armindo hatete, kompeténsia Komisaun Nasionál Elesaun CNE (Komisaun Nasionál ba Eleisaun sira) nian hodi fó hanoin ba partidu politiku sira atu toma atensaun ba militante sira labele mai lori labarik sira partisipa iha kampaña.
“Portantu partidu polítiku sira iha hanoin no hatene katak labarik ki’ik sira labele lori ba kampaña só sira ne’ebé ho idade 18 ba leten mak bele partisipa hodi rona programa husi kandidatu sira aprezenta. Maibé filafali ba konsiénsia ema nian liliu ba ekipa susesu sira atu kontrola no fó sai avizu kona-ba regra ne’ebe CNE fo sai ona”, dehan nia.
Tanba Polísia Nasionál laiha kompeténsia atu impede inan aman lori labarik ba tuir kampaña Prezidensiál maibé militante no kandidatu sira mak orienta inan aman labele lori oan ba tuir kampaña.
“Agora Polísia mós sei la bandu ema ne’ebé lori labarik mai kampaña tanba ne’e CNE prsiza halo nafatin sensiblizasaun ba ekipa susesu kada kandidatura sira atu fó hanoin ba militante no komunidade sira atu labele labarik ki’ik ba fatin kampaña”, afirma nia. (*)
