“Ba oin ha'u servisu maka’as ho Governu para ita ekonómia haksoit ba oin”, dehan nia hafoin hala'o kampaña loron daruak iha kampu futebool Teriloka, Munisípiu Baukau, kinta (03/03).

Tanba Prezidente Repúblika tenke iha fuan no iha kapasidade, halo diálogu, ko'alia ho Governu, no Parlamentu Nasionál, inklui komunidade, atu haree hamutuk saida mak prioridade ba rai ida ne'e, liliu ko’alia Governu oinsá mak bele kria kondiasaun di’ak iha rai laran, para investidór rai liur bele mai.

Hanesan kandidatu Prezidente Repúblika, bainhira povu fó konfiansa eleitu, mak sei iha diálogu ho partidu polítiku sira ne'ebé asentu iha Parlamentu Nasionál, oinsá rezolve situasaun krebilidade legalidade meza Parlamentu nian.

Maske Partidu balun komesa hanoin no ko'alia asuntu ida ne'e, maibé husu atu lalika hanoin ho rezultadu eleisaun, tanba esforsu ne'ebé mak halo hamutuk ho Partidu CNRT hahú la'o hela oinsá bele hetan maioria foun iha Parlamentu Nasionál.

Tanba programa tinan lima, ne'ebé Prezidente Repúblika sei halo primeiru mak uza kompeténsia hanesan Prezidente Repúblika, maibé tenke iha diálogu ho entidade sira.

“Razaun ida atu halo diálogu, primeiru mak ida ne'e, ita rezolve violasaun konstituisaun, hadi'a Parlamentu hadi'a Governu, oinsá mak ita atu halo, mesmu ke rezultadu ne'ebé mai husi ha’u-nia diálogu ho partidu CNRT ho partidu hothotu iha Parlamentu, ita haree oinsá ita atu ba oin, tanba balun bele hatete ha’u lakohi kontinua iha koligasaun ida ne'e, entaun asunsuventi saida, ne'e para hatete diálogu”, esplika nia. (*)