Tempotimor (Dili)-Institutu Defeza Direitu kriansa (INDDICA) ho Membru Rede Advokasia Diretu Labarik, Marceira Pereira hatete, sei servisu hamutuk ho parseiru protesaun diretu labarik nian, inan-aman no mahein labele utiliza labarik sira fa’an sasán iha tempu kampaña eleisaun prezidensiál.

“Inan-Aman no mahein haburas nafatin sentimentu respeitu ba malu, no labele fahe labarik sira-nia amizade, tanba diferensa polítika hosi família sira, membru rede advokasia informa, ba inan-aman sira la bele utiliza labarik sira ba fa'an iha tempu kampaña eleisaun prezidensiál, hodi promove partisipa labarik iha prosesu aprendisajem iha kampaña”, dehan Marcelina iha fatin salaun Ministériu Solidariedade Sosiál no Inkluzaun, Kaikoli kinta (24/02).

Tanba ne’e husu ba profesór sira mantein kompromisu atu labele abandona labarik sira iha tempu kampaña. No labele fó lisensa ba alunu sira atu ba partisipa kampaña durante prosesu aprendizajen (ho esesaun hosi estudante ne’ebé eleitór tiha ona tinan 17 tiha ona).

“Dirijente eskola no profesór sira asegura kontinuasaun husi prosesu aprendizajen durante tempu kampaña no rejistu infrasaun dixiplinár ba profesór ne’ebé la marka prezensa”, haktenik nia.

Rede advokasia ho parseiru hotu Sosiedade sivíl no Konfisaun Relijiozu sira Igreja nian apoiu nafatin fahe informasaun kona-ba direitu labarik no bandu partisipasaun durante tempu kampaña.

Tanba ne’e, bele fó sai informasaun liuhusi liturjia ba sarani sira iha misa tempu, durante períodu kampaña hodi labele envolve labarik iha prosesu kampaña nian laran. (*)