Desizaun PLP ne’ebé fó sai husi Diresaun Partidu nian iha loron kinta (24/02) hodi fó liberdade ba estrutura, militante no apoiante atubele vota ba kandidatu 15, ne’ebé la inklui kandidatu José Ramos Horta ne’ebé hetan apoiu husi Partidu CNRT ne’ebé lidera husi Kay Rala Xanana Gusmão.

Vise Xefe Bankada Partidu Libertasaun Popular (PLP), deputadu Franciso Vasconcelos hatete, iha eleisaun prezidensiál períodu 2022-2027, estrutura Partidu Libertasaun Popular (PLP) deside ona atu militante PLP iha teritóriu vota ho konsiénsia.

“Ami deside ona atu vota ho konsiensia, neebe militante partidu PLP bele vota se deit, inklui fo votu ba senhora Isabel, bele mos vota Lere, Milena Pires, Lú Olo, menus Horta”, dehan nia ba www.tempotimor.com liuhusi telefone (24/02).

Tanba nne’e, Partidu Libertasaun Popular (PLP) sei oferese mós votu ba Kandidata Prezidente Repúblika períodu 2022-2027, Isabel da Costa Ferreira, iha eleisaun Prezidensiál, loron 19 marsu 2022.

Kandidata Prezidente Repúblika, Isabel da Costa Ferreira ho númeru sorteiu (1) hatete, dadaun ne’e nia hetan apoiu husi militante Partidu Libertasaun Popular (PLP), tanba iha balun ne’eb’e sai hanesan ekipa susesu.

“Agora ha’u hetan apoiu husi militante PLP nian, sira mós balun tama iha ha’u-nia ekipa vitória, ha’u hanesan kandidatu independente e ha’u sempre dehan kandidatu independente di’ak liu ba prezidente ida,” dehan Kandidata Isabel Ferreira ba jornalista iha Balide Dili, kinta (24/02).

Bainhira kandidatu envolve-an iha Partidu Polítiku, maibé hakarak kandidata, nia deklara sai husi partidu no deklara-an hanesan kandidatu independente.

“Ha’u karik iha partidu mós hakarak kandidata ha’u deklara sai husi partidu ne’e, deklara ha’u-nia an hanesan independente, tanba esperiénsia iha mundu hatudu”, informa nia.

Tuir kalendáriu kampaña ba kandidata Isabel Ferreira sei hahú iha Postu Administrativu Lekidoe, Munisípiu Aileu, tanba Likidoe dalan aat di’ak liu ba uluk iha ne’ebá hasoru malu ho komunidade sira, hafoin kontinua ba fatin seluk.

“Ha’u sei hala’o ha’u-nia kampaña iha Lekidoe, karik CNE aprova ha’u-nia kalendáriu, tanba imi hatene dia 2 de marsu kuarta feira sinzas, entaun ha’u tenke ba misa, sai misa mak ha’u bele halo kampaña”, dehan nia.

Kampaña ne’e halo ho modelu mini kampaña dor to dor de’it, tanba kandidatura ne’e mai hanesan revolusaun mentál.

“Entaun atu sai sujeitu, ha’u hanesan kandidatu mak ba buka povu la’ós povu mai buka fali kandidatu ne’ebé mobiliza fali povu mai iha fatin-fatin mak kandidatu ba koa’lia”, deklara nia. (*)