Print this page

Tanba sá povu la kopera ho medida prevensaun Covid-19 ne’ebe Governu halo?

Tempotimor (Dili)-Loron ba loron, Polísia Nasionál Timor-Leste (PNTL) ho Falintil-Forsa Defeza Timor-Leste (F-FDTL) no autoridade sira tenke halo inspesaun, chek point no “tuun liman” para bele kontrola povu nia movimentu iha durasaun “lockdown” ne’e.

Tanba sá povu sira la kopera rasik? Parese falta iha komikasaun ka lakon fiar entre autoridade ho povu. Maibé situasaun ne’e sei bele hadi’a.

Povu barak seidauk komprende Tanba sá sira tenke hela iha uma de’it. Sira haree katak ema ne’ebe kona Covid-19 ne’e mos laiha moras. Tanba sira la hetan justifikasaun klaru husi Governu. Tanba ne’e, povu balu intepreta katak, Governu atu halo susar sira nia moris de’it, tanba ne’e lakohi kopera.

Sekarik PNTL no F-FDTL ba siak sira, sira halai fila ba uma, maibé iha sira nia fuan laran ne’e hirus boot ba autoridade sira. Bainhira PNTL no F-FDTL laiha, sira sai fali de’it.

Parese di’ak liu Governu fo informasaun klaru para povu komprende, Tanba saida sira tenke hela iha uma de’it. Sekarik esplikasaun ba ema hotu klaru, sira sei kopera no la presiza uza forsa, maibé importante mak fo informasaun klaru.

Dadaun, povu balu mos komesa duvida kona-ba Covid-19 iha Timor-Leste. Tanba saida sira duvida? Tanba ema ne’ebe Governu deklara mate tanba kona Covid-19 tuir loloos mate tanba sira iha moras serius seluk tan. Sira intepreta katak Governu atu hatauk sira de’it. Sekarik informasaun klaru, simples no loos, povu sempre fo fiar no kopera ho autoridade sira.

Ami mos haree katak, dadaun Governu Timor-Leste hili ona atu vasina povu tomak ho Vasina Covid-19, Astra Zeneca. Maski iha mundu tomak, ema balun buka opportunidade atu simu vasina Covid-19, iha Timor-Leste sei iha persepsi negativu kona-ba vasina Covid-19 ne’e.

Tanba saida ema balu lakohi simu no tauk ho vasina Covid-19 Astra Zeneca? Parese Governu tenke hato’o informasaun loos kona-ba benefisiu ho risku vasina AstraZeneca ne’e. Sekarik la fo informasaun loos, povu sei duvida. Parese tanba kampaiña vasinasaun ne’ebe Governu halo la hato’o informasaun loos kona-ba risku vasina ne’e, povu komesa duvida. Keta hanoin katak povu ne’e beik. Sira bele halo desizaun di’ak, sekarik sira hetan informasaun ne’ebe loos. Povu Timor-Leste mos hatene katak, nasaun barak sei uza vasina AstraZeneca. Sira mos hatene katak nasaun balu la permite uza.

Maski posibilidade ki’ik atu hetan “kesan sampingan” husi vasina AstraZeneca, autoridade sira tenke rekonese katak, posibilidade ne’e iha no hato’o informasaun klaru kona-ba risku ne’e. Ema la tauk bainhira sira simu informasaun loos. Sira komesa tauk no duvida bainhira sira simu informasaun ne’ebe la loos.

Parese povu mos la klaru kona-ba benefisiu vasina AstraZeneca. Parese autoridade balu mos la klaru. Ema hotu tenke klaru katak, agora dadaun, benefisiu vasina AstraZeneca mak hamenus possibilidade atu mate ka kona sintomas serius tanba Covid-19.

Sekarik grupu ida hetan ona vasina, possibilidade grupu ne’e atu kona sintomas serius ka mate tanba Covid-19 ne’e menus ho kada 63%. Ne’e signifika katak simu ona vasina, sei bele kona Covid-19, maibé hamenus posibilidade kona sintomas serius.

Informasaun loos, simples ho klaru importante tebes. Sekarik autoridade sempre hato’o komunikasaun ne’ebe loos, simples ho klaru, nasaun Timor-Leste bele forte no manan iha funu ho Covid-19 ne’e. Maibé sekarik fraku iha komunikasaun no informasaun, problema oin oin sei mosu. (*)

Rate this item
(1 Vote)
Last modified on Saturday, 15 May 2021 16:19
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items