Print this page

Hamutuk ita bele halakon inimigo Covid-19. UNIDADE1975

Mapa Timor Leste Mapa Timor Leste Foto Suplai

Nasaun barak deklara ona estado de emergência. Lider sira iha nasaun seluk dehan katak sira nia nasaun halo funu dadaun, funu hasoru Covid-19. Ita haree ona Xina oinsa manan Covid-19 ho maneiras maka’as. Nasaun Xina bele halo nune’e tanba sira nia unidade maka’as, no povu tuir governo atu bele halakon inimigo ida ne’e.

Timor-Leste mos prepara atu deklara estado de emergência. Maibe realidade mak Timor-Leste la preparadu ba funu ida ne’e. Problema bo’ot laos parte saude maibe ita falta unidade.

Povu Timor-Leste pronto mai hamutuk, sai ida deit. Nai ulun sira sei contra malu hela. Agora laos tempo atu ita rasik hatuun malu. Agora, ita presiza heróis husi gerasaun 1975, mai hamutuk nu’udar ekipa ida deit atu lidera nasaun fila fali, atubele hasoru funu ida ne’e. Heróis ida-idak fo kontribusaun ne’ebe uniku no importante tebes, maske dala ruma ideias la han malu. Ita presiza espirito unidade ida ne’e atu mosu fila fali.

Heróis husi 1975 sei bele lidera nasaun iha tempo agora. Ami, nu’udar povu Timorense, apela ba heróis hanesan Sua Excelensia Xanana Gusmao, Sua Excelensia Mari Alkatiri, Sua Excelensia Jose Ramos-Horta, Sua Excelensia Francisco Guterres Lu Olo, Sua Excelensia Taur Matan Ruak no Sua Excelensia Lere Anan atu mai hamutuk no lidera nasaun fila fali. Nasaun Timor-Leste presiza ita nia heróis.

Timor-Leste sei la bele halakon inimigo ida ne’e se karik la iha unidade nasional. Hamutuk ita hamriik, fahe malu karik, ita monu. Ita presiza istoria husi 1975 atu sai realidade fila fali. Krize hotu-hotu mos lori oportunidade. Ita hetan oportunidade atu herois 1975 bele mos fila fali. Ami nu’udar povu Timorense hamriik hamutuk ho #UNIDADE1975. Ita la sai heróis mesa-mesak maibe sai ekipa heróis ida. Tempo to’o ona. Simu malu ba. Nasaun presiza ita boot sira.

Hakerek husi : Cidadaun matan moris neon nain

#UNIDADE1975

Rate this item
(0 votes)
Last modified on Friday, 27 March 2020 17:33
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items