Maibé, problema mak governu hatama fali OJE 2020 ba PN {dehan, (dehan de'it tenki dehan tuir Lei), hatama fali iha loron 13 fulan-Dezembru depois muda ba iha loron 19 fulan-Dezembru}. Liu-hosi dalan ida ne'ebé? Hatama fali tuir ha'u, dalan legál, taka hotu ona (dalan só loke fali ba governu foun). Kolega sira balun argumenta dehan:
(1) Hatama nafatin liu-hosi Lei OGF artigu 30° no. 1 no Rejimentu PN artigu 163°. Maibé, dalan hirak ne'e taka ona iha loron 15 fulan-Dezembru liubá.
(2) Hatama fali liu-hosi Rejimentu PN artigu 94°, no. 1. Maibé, dalan ida-ne'e mós taka ona ba proposta Lei não votada (tamba retira ona), tamba la karese atu hatama fali sesaun lejislativa tuir mai.
Kolega sira hetan karik dalan seluk ita bele kompleta malu, karik la hetan, OJE 2020 mak iha loron 19 fulan-Dezembru, governu hatama fali duni no PN nasionál simu fali duni, ne'e katak, OJE 2020 haksoit muru governu nian, depois ba haksoit tan muru PN nian (haksoit muru rua kedas ne'e bele ka lae?).
Mak la hetan dalan legál, implika ilegalidade ba governu no PN nia aktu sira. Tanba, prinsípiu "PRIMADO DA LEI" ne'ebé sai prinsípiu fundamentál ba Estado de direito democrático haruka Estadu atu bele aktua de'it "secumdem legem" (katak aktua de'it tuir Lei) no labele aktua "praeter legem" (katak labele haksoit liu Lei)
Obrigadu no Boa tarde!
Autór: Pe. Julio Crispim Belo
