Reprezentante Sekretáriu Estadu Kooperativa, Xefe Gabinete Arlindo Marcal, hateten, tenke hola parte iha setór kooperativa liu-liu feto sira inklui ema vulneravél sira hodi halakon ema ne'ebé halo diskriminasun feto iha setór kooperativa sira.
"Iha impedimentu barak atu asesu ba oportunidade, eh dalaruma ita nia komunidade ne'e sai limintasaun atu hatene informasaun, atu limita bareira sira ne'ebé sai impedimentu bazeia ba jéneru ne'e sai hanesan objetu ne'ebé importante iha movimentu kooperativu, tanba ne'e movimentu kooperativu atu luta redúz halakon hanoin sira ne'e", dehan nia iha, Salaun Suprise Hotel, Manatutu, segunda (21/11).
Tanba iha Timor-Leste mós selebrasaun loron nasionál feto ne'ebé ho objetivu ida atu halakon impedimentu feto iha atividade ekonómia hotu.
Maibé, realidade ne'ebé hatudu iha Timor-Leste feto sira lidera kooperativa sai dezenvolve tebes hodi kontribui ba valor ekonómia iha família no sosiedade.
Kooperativa sira ne'ebé lideradu husi feto mak hanesan, kooperativa HIKMOR, LANAMONA, no seluk iha Munisípiu sira.
Tanba, situasaun realidade ne'ebé Timor Leste enfrenta dadaun ne'e, feto maioria iha de'it uma ka halo servisu uma nian, oinsá atu tane kaben (laen) ho di'ak no dalabarak feto hala'o serbisu ne'ebé boot, maibé la iha vensimentu.
"Simu vensimentu karik montante la hanesan ho mane sira nian, nune'e mós ho ita nia kultura hola feto ho mane ne'e, kuaze ke la iha autoridade", dehan nia.
Nune'e, situasaun hirak ne'e feto maioria la partisipa iha eventu barak, tanba la iha tempu, tanba nia haree oan serbisu uma laran no seluk tan, ikus mai menus partisipasaun feto iha eventu boot sira.
Alende ne'e, Diretora Gabinete Igualidade ba Jéneru, Ana Paula Pacheco Magno mós hatete, ema hotu iha direitu, tanba Igualidade Generu iha nia ramu ne'ebé ajuda feto sira hodi kontribui ba sosial viabiliza dezenvolvimentu iha Timor-Leste.
"Igualidade Generu hanesan fundamental ba ekonómia ne'ebé iha ramu oioin, nune'e mós halo serbisu di'ak ba sosiál viabiliza dezenvolvimentu ba sosiu-ekonómiku no kulturál", nia afirma.
Tanba, movimentu kooperativa liuhusi atividade semináriu bazeia ba topiku ne'ebé sita ona iha leten ne'e, bele hamoris fali instrumentu sosiu-ekonómiku atu bele hakmaan ba efeitu sira iha krize no bele kontribui hamenus ba dezigualidade.
Dirijente Kooperativa Suri-Nahak, Maria Teresa Ono Lay Correia, senti kontente partisipa iha semináriu Abordagem Integradu ne'e, tanba ajuda ona sira oinsá eleva kooperativa ne'ebé lideradu husi feto.
"Ami sente kontente iha semináriu ne'ebé implementa iha kooperativa Suri-Nahak, durante hala’o ba loron ohin, tanba topiku rua ne'ebé fahe husi ekipa SEKOOP ba membru no dirijente kooperativa mai ami iha ne'e, bainhira nia kooperativa la'o ho di'ak, ami tenke foti importante topiku sira ne'ebé mak ami simu", dehan nia
Nia parte promote, sei kumpri hotu regulamentu ne'ebé atu eleva kooperativa sira iha Suri-Nahak.
Nune’e, semináriu Abordagem Integradu Igualidade Generu Setór Kooperativa iha Munisípiu Manatutu ne'e, oradór dahuluk Diretora Nasionál Edukasaun Formasaun no Informasaun NDEFI, Jacinta dos Santos no Asesór prinsipál Bonifacio Correia husi SEKOOP ho topiku ne'ebé la hanesan. (*)
