“Komunikadu Imprensa, Deklarasaun Kona-ba Situasaun iha Mianmar. Dili, 29 Jullu 2022. Prezidente Repúblika, José Ramos Horta konvoka reuniaun ida iha nia gabinete ho Prezidente Parlamentu Nasionál, Membru sira husi Komisaun B, no Primeiru Ministru hodi diskute kona-ba agravamentu situasaun dramátika iha Mianmar”, deklara Komunikadu Imprensa ne'ebé www.tempotimor.com asesu husi gabinete Prezidente Repúblika, sábadu (30/07).

Husi rezultadu reuniaun urjente refere mak líder timoroan sira konfere deklarasaun unánima ne’ebé hasai husi Prezidénsia ASEAN no rezolusaun unánima husi Konsellu Seguransa ONU (CS-ONU) kona-ba ezekusaun trájika no arbitrária ba sidadaun sivil na'in-haat, membru husi pró-demokrátiku Mianmar.

Nune'e líder timoroan sira ne’ebé partisipa iha reuniaun ne’e elojia pozisaun husi dirijente ASEAN no husi CS-ONU nian no apoiu ho forma integrál deklarasaun-rua ne’e.

Ba situasaun hirak ne'ebé akontese mak Repúblika Demokrátika Timor-Leste (RDTL) apela mós ba komunidade internasionál atu kontinua hakbi'it esforsu tomak atu kontribui hodi hatuur hikas fali orden demokrátiku liuhusi diálogu ho parte hothotu. (*)