Login to your account

Username *
Password *
Remember Me

Items filtered by date: Thursday, 29 April 2021

Tempotimor (Dili)- Governu liuhusi Konsellu Ministru (KM) deside taka provizóriu (bandu) atividade selebrasaun relijioza durante loron 14 nia laran.

Ministru Prezidensia Konsellu Ministru, Fidélis Leite Magalhães, hafoin reiuniaun KM, kinta (29/04), hatete atividade relijioza sei bandu, tanba atividade ne’ebé halibur ema barak.

“Bandu atu hala’o atividade selebrasaun relijioza ne’ebé implika ezisténsia ema halibur-malu”, deklara Fidélis iha Palásiu Governu, kinta (29/04).

Tanba, efeitu Rezolusaun Governu nian ne’e, konsidera nu’udar ema halibur-malu mak ema liuhusi na’in-rua halibur malu menus husi metru rua entre sira.

Aleinde ne’e, bandu atu organiza no hala’o serimónia funerál nian iha ne’ebé ema liu na’in-sanulu mak partisipa.

Maibé, ema ne’ebé partisipa iha serimónia ne’e tenke uza máskra hodi taka inus no ibun, no mantein distánsia pelumenus metru ida ho ema seluk ne’ebé partisipa iha serimónia refere. (*)

Published in Politika

Tempotimor (Dili) - Governu Brazil ho prontidaun tomak sei tulun Sekretária Estadu Kooperativa (SEKoop) hodi dezenvolve área kooperativa haat iha Timor-Leste.

Published in Ekonomia

Tempotimor (Dili)-Prezidente Repúbliku (PR), Francisco Guterres ‘Lú Olo’, fó konfiansa ba Prezidente Tribunal Rekursu (TR), Deolindo dos Santo, hodi kontinua haforsa sistema justisa iha Timor-Leste. Tanba ne’e, Prezidente Repúblika iha loron kinta (29/04), fó pose ba Juiz Deolindo dos Santos, hodi lidera Tribunal Rekursu ba mandantu tinan haat.

Xefe Estadu iha konfiansa boot iha Juíz Deolindo nomós iha koletivu Juíz sira iha Tribunal Rekursu, ne’ebé iha esperiensia ho méritu.

“Orgaun Estadu nian ne’e, povu enjerál sei akompaña beibeik kna’ar husi Prezidente Tribunal Rekursu nomós husi koletivu Juíz sira tomak ne’ebé halo parte ba, oinsá imi hotu hala’o imi-nia kna’ar loroloron atu haforsa justisa iha ita-nia País", dehan PR Lú Olo iha Palasíu Prezidensiál Bairopite, kinta (29/04).

PR Lú Olo hein katak iha mandatu tinan haat ne’e sei bele kontinua misaun ho dalan ne’ebé di’ak, tanba ho koñesimentu hatudu ona durante mandatu dahuluk nian.

"Parabéns no votu ho laran ksolok atu hetan susesu boot liután durante Deolindo dos Santos ninia mandatu ida tan, ba hala’o justisa lais liu no hakbesik liután ba sidadaun sira", afirma. (*)

Published in Justisa

Tempotimor (Díli)-Kompaña internasional husi nasaun Xina, Sanhai Constraction entrega armajen boot rua ba governu Timor-Leste (TL) hodi halibur produtu sira husi Munisípiu.

Ministru Koordenadór Asuntu Ekonomiku (MKAE), Joaquim Amaral hatete, armajen ne'e iha Munisípiu Baukau no Manatutu, Postu administrativu Natarbora.

"Armajen boot rua ne'e ajuda tebes ita. Kapasidade armajen ne'e bele rai fós ho volume 5 mil tonelada no mákina prosesamentu hare, no loron ida bele prosesa to’o 20 tonelada”, dehan Joaquim iha salaun Trad Invest, Kolmera, kinta (29/04).

Mákina sira ne'e prepara ona iha armajen ho kondisaun modernu, bainhira halo produsaun ho automátika.

Iha fatin hanesan, Ministur Agrikultura no Peska (MAP), Pedro Reis, agradese ba Governu Xina ne’ebé oferese armajen hodi asegura produtu sira.

"Lori povo Agrikultor nia naran fó agradese ba sira, tanba ita iha ona armajen ne'ebé mak di’ak”, dehan Pedro.

Reprezentante Kompaña Sanhai Constraction, Geng Xiewei, esplika prosesu harii armajen ho durasaun fulan-18, (Junu 2019 to'o Marsu 2021), kompleta fatin ba produsaun.(*)

Published in Ekonomia

Tempotimor (Dili)- Governu liuhusi Konsellu Ministru (KM) iha loron kinta (29/04), deside aplika serka sanitária ba Munisípiu sia iha territóriu tomak.

Munisípiu sira ne’ebé mak tama ba serka sanitária hanesan Ainaro, Baukau, Díli, Ermera, Kovalima, Vikeke, Lautein, Likisá no Manufahi.

Ministru Prezidente Konsellu Ministru (MPKM), Fidélis Mangalhães hatete, rezolusaun ne’ebé Konsellu Ministru aprova hodi hodi renova serka sanitária ba Munisípiu neen.

“Aprova mós projetu Rezolusaun Governu nian ba renovasaun ba impozisaun serka sanitária iha munisípiu Ainaru, Baukau, Dili, Ermera, Kovalima no Vikeke, ba loron 14 tan, to’o tuku 23:59 husi loron 16 fulan-maiu tinan 2021”, esplika Fidélis ina Palásiu Governu, kinta (29/04).

Iha ne’e governu mós deside aplika serka sanitária ba Munisípiu tolu durante loron 14. “Aprova mós impozisaun serka sanitária iha munisípiu Lautém, Likisá, Manufahi, entre tuku 00:00 iha loron 30 fulan-abril tinan 2021 no tuku 23:59 loron 16 fulan-maiu tinan 2021”, deklara nia.

Nune’e, bandu sirkulasaun ema nian entre munisípiu ne’e ho sirkunskrisaun administrativa sira-seluk, exetu iha kazu sira ho fundamentu forte tanba razaun seguransa públika, saúde públika, asisténsia umanitária, manutensaun husi sistema abastesimentu públiku, ka razaun seluk ne’ebé presiza atu hala’o ba interese públiku nian. (*)

Published in Politika

Tempotimor (Dili) - Governu liuhusi Konsellu Ministru reativa fali ona konfinamentu Domisiliáriu jerál (KDJ) durante loron 14 ba Munisípiu Dili.

Published in Politika

Tempotimor (Dili)- Ministériu Obras Públika (MOP) identifika ona projetu reabilitasaun estruturál simples hamutuk 57 no komplexa hamutuk 44, tanba hetan estragu husi inundasaun.

Ministru Prezidensia Konsellu Ministru, Fidélis Magalhães hatete, levantamentu dadus ne’e foti hafoin inundasaun ne’ebé mosu iha loron 4 fulan-abril tinan 2021, tanba infraestrutura barak mak hetan estraga iha territóriu tomak.

Liuhusi Konsellu Ministru, loron 29 fulan-abril, Ministru Obras públikas, Salvador Soares dos Reis Pires, aprezenta dadus kona-ba identifikasaun ba infraestrutura no ba ekipamentu públiku koletivu ne’ebé hetan estragu husi inundasaun.

“Levantamentu dadus klasifikasaun husi obra hala’o hela maibé Informasaun preliminár sira indika ba projetu reabilitasaun estruturál simples 57 ne’ebé iha husi kustu inferiór dolar amerikanu millaun 1 no projetu reabilitasaun estruturál komplexa 44 ho kustu estimadu boot-liu dolar amerikanu millaun 1”, informa Fidélis iha Palásiu governu, kinta (29/04).

Iha aprezentasaun ne’e, relata mós kona-ba atividade limpeza, normalizasaun no iha projetu oioin ho karáter emerjénsia ne’ebé maka hala’o hela.

Aliende ne’e, Ministru Administrasaun Estatál, Miguel Pereira de Carvalho, iha kualidade Koordenadór ba Unidade Misaun ba Protesaun Sivíl no ba Jestaun ba Dezastra Naturál sira, halo aprezentasaun ida kona-ba pontu situasaun husi impaktu sira husi inundasaun iha loron 4 fulan-abril liubá no sira-nia asaun rekuperasaun.

Daudaun ne’e iha ema 4356 ne’ebé desloka ba sentru akollimentu hitu ne’ebé sei ativu. Iha nivel nasionál afeta ona husi inundasaun ba família ho totál 31, 337 no ema na’in-41 mak mate ka lakon.

Ho totál 21 178 abitasaun iha país tomak ne’ebé mak estraga. Ba infraestrutura públika, bee-sa’e provoka estragu iha estrada hamutuk 22 no ponte hamutuk 11.

Governu fó hela apoiu ba família afetada ho produtu alimetár no la’ós alimentár no halo hela planu atu distribui materia sira ba rekonstrusaun ba abitasaun sira ne’ebé mak estraga.

Analiza mós opsaun realojamentu ba populasaun ne’ebé mak hela iha área proibidas ne’ebé bele hetan iha área inundasaun no área foho lolon sira ho perigozidade média to’o aas.

Ikusliu, Vise Primeiru Ministru no Ministru Planu no Ordenamentu, José Maria dos Reis, aprezenta konjuntu medida sira ordenamentu teritóriu ba prevensaun no mitigasaun ba risku sira. Hala’o ona levantamentu dadus kona-ba área risku ne’ebé lokaliza iha zona inundasaun no área foho lolon sira ho perigozidade média to’o aas.

Iha ne’e, José Reis, aprezenta mós nesesidade intervensaun lejislativa iha ámbitu ordenamentu teritóriu, opsaun ba realojamentu temporáriu no definitivu ba populasaun sira no posibilidade fatin ba realojamentu. (*)

Published in Politika

Tempotimor (Dili) - Ministru Prezidentsia Konsellu Ministru (MPKM), Fidélis Mangalhães, hateten, governu deside sidadaun Timoroan no estranjeiru sira bainhira tama iha Timor-Leste tenki iha atestadu mediku livre Covid-19 no vasina kompleitu sei la tama karantina.

"Sidadaun nasional no estranjeiru ne'ebé mak tama husi liur mai iha ita-nia rai laran bainhira sira aprejenta sertifikadu katak sira hetan ona vasina kompleitu sei la presija halo karantina maibe sira mos presija teste swab katak antes sae aviaun tenki teste rezultadu hatudu negativu," dehan Fidelis iha Palásiu Governu Dili, Kinta (29/04).

Fidelis esplika, sidadaun sira ne'e sei hatudu atestadu mediku teste swab negativu no iha sertifikadu vasinasaun kompleitu, sidadaun sira ne'e la presija halo karantina.

Governante ne'e akresenta, enkuandu iha rai laran, bainhira atu halo viajem ba Munisipiu nafatin tuir Prosesu teste Swab husi Sentru Intergradu Jestaun Krize (SIJK) no ba sidadaun Timoroan ne'ebé simu ona vasina kompleitu bele movimentu ba mai Munisípiu.(*)

Published in Politika

Tempotimor(Dili)- Akademista Universidade Nasionál Timor Lorosa'e (UNTL), Júlio Aparicio hatete, Governu nia esforsu ba kombate covid-19 ne'e di'ak, maibé presiza kria kondisaun di'ak ba sidadaun hotu iha situasaun serka sanitária (SS).

Tanba, Serka Sanitaria ne'ebé fulan kotuk Timor-Leste implementa ne'e halo povu terus, liuliu povu ai-leba sira ne'ebé buka moris iha Dili inklui estudante sira.

“Maneira hotu-hotu ne'ebé governu halo ne'e di'ak ona, maibé sira presiza kria sistema ida ne'ebé bele fo garante ba ema hotu no labele halakon povu nia konfiansa ba kombate pandemia covid-19”, dehan Júlio iha kna’ar fatin kampus Lama UNTL, kaikoli, kinta,(29/04).

Tamba durante ne’e, governu seidauk hatudu evidensia ne'ebé forte kona-ba ezistensia covid-19 iha TL.

"Ita Timor realidade, ema mear, isin manas, inus metin ne'e la'ós buat foun ida, tan ne'e governu tenke hatudu kronolojia klaru kona-ba ema moras covid-19, selae povu sei hatoman-an ho informasaun katak covid-19 ne'e bosok”, afirma Júlio.

Governu presiza seriedade intermu buka maneira ida ne'ebé di'ak liu no labele fó impaktu ba ekonomia povu, liliu estudante.(*)

Published in Politika

Tempotimor (Dili)- Deputadu Bankada Congresso Nacionál de Reconstrução de Timorense (CNRT), Arão Noe Amaral de Jesus husu atu Tribunal Rekursu (TR) presiza hari’i tan tribunal iha Munisípiu sira.

Atu lori justisa hakbesik-an ba povu, mak Prezidente Tribunál Rekursu (PTR), Deoliando di Santos presiza alarga tan tribunal iha Munisípiu.

Ho kondisaun Tribunal Distritál dadaun ne’e estabele iha Timor-Leste, seidauk bele responde prinsipiu atu lori justisa hakbesik ba povuk.

"Se bele alarga tan tribunal sira, la'os agora haat de'it, tanba ita-nia prinsípiu lori justisa ba povu”, hatete nia iha resintu PN, kinta (29/04).

Hanesan ezemplu, tribunal distrital Díli, dadaun ne'e atende ema barak hahú husi munisípiu Ermera, Aileu, ho Likisá, atubele mai tuir justisa tanba ne'e, husu tau tribunál iha kada munisípiu para lori justisa ne'e besik ba povu. (*)

Published in Politika
Page 1 of 2
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« April 2021 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Tempo Timor Networks

Online Counter