Tempotimor (Dili)-Ekipa Sentru Integradu ba Jestaun Krize (SIJK) hamutuk ho Ministeriu Saude hahú hasai amostra ba Timor-oan sira iha teritoriu nasional hodi halo prevensaun ba transmisaun lokal surtu Covid-19 iha Timor-Leste.
Iha triajen ne'ebé hala'o durante loron tolu, hahú husi 5 Maiu to'o 8 Maiu 2020 ne'e, rekolla amostra hamutuk 186.
"Hakarak agradese ba maluk sira ne'ebé koopera tiha ona ho ekipa sira ne'ebé iha terenu hahú husi loron 5 Maiu to'o loron 8 Maiu, ne'ebé mak rekolla ona totál kazu ka amostra 186," dehan Portavoz SIJK Odete da Silva Viegas iha sala situasaun, Sentru Konvensaun Dili, Domingu (10/05).
Odete dehan, hafoin rekolla amostra, ekipa mediku halo ona teste ba amostra balun.
"Rezultadu balun iha ona, maibé balun seidauk, depois sira ne'ebé rezultadu iha ona ne'e laboratóriu hatudu katak negativu," nia dehan.
Iha biban ne'e, Odete husu ba sidadaun sira, liu-liu familia ne'ebé nia membru balun tama kuarentena ka izolamentu atu kontinua koopera.
"Husu ba ita hotu, inan-aman, familia sira ne'ebé sira-nia oan ka parentes tama iha prosesu kuarentena ne'ebé liu ba ne'e ka sira ne'ebé submete ba izolamentu, atu nafatin koopera, nune'e ita hamutuk bele deteta no prevene kazu Covid-19 iha ita-nia rai," nia dehan.
Entretantu, tuir planu, ekipa SIJK no MS sei kontinua triajen ba faze daruak iha 11 Maiu to'o 15 Maiu 2020.
Odete husu nafatin ba autoridade munisipiu no autoridade lokal sira atu kontinua koopera ho ekipa SIJK no MS ne'ebé hala'o triajen no sentinela survilense hodi bele identifika karik iha ona transmisaun lokal surtu Covid-19.
Error: No articles to display
.